Ich Chuenrat von Vreuntshausen und mein hausfrawe Gedraut^a und all unser erben wir verjehen offenwar an disem prief und tuen chunt allen den di in sehent oder hoerent lesen, di nu lebent oder her nach chümftig werdent, daz wir mit verdachtem muet mit gesampter hant, ze den zeiten do wir iz wol getuen machten, haben ze chaufen gegeben hern Otten von Hagenawe choerherren und aller der sampnunge dez gotshauss dacze^b Sand Poelten, ze den zeiten probst Dyetmarn und techent Wernharten dez ee genanten gots haus, unsers rechten aigens drithalb phunt gelts und zwainzich phenning gelts, di do ligent dacze^c O^eczenstoerf pei Chappell um ainz und dreizzig phunt wienner phenning, der wir redleich und recht gewert sein. Di selben gült dient man von vier hofsteten: von den zwain hofsteten dient man alle jar von isleicher^d fumfzehen phenning an sand Michelstag und zwai hüener und ze vaschang von isleicher hofstat ain huen, und ze weinachten, ze oestern und ze phingsten von isleicher hoeczeit dient man drei ches, daz ie der ches zwaier phenning wert sei, und ze oestern von isleicher hofstat dient man dreizzich air; von der dritten hofstat, do auf siczet Chunr.^e der Lanfuez, dient man^f an sand Michhelstag zwainzig phenning; von der vierden hofstat Ulreich der Eschenawer dient an sand Michhelstag achzehen phenning. Di andern gült di leit auf æchern und auf wismad, do van man dient alle jar an sand Michelstag achzehen meczen waicze und sechsthalben meczen chaern und vir meczen gersten und sechs meczen habern und zwen und achzk phenning und vier hüener, und an sand Plasentag dient man fumf und zwainzich hüener und drei phennig. Di selben guelt hab wir in gegeben mit allen dem recht als wir di haben inne gehabt versuecht und unversuecht. Und sie schullen auch mit unserm gueten willen allen ieren frum schaffen mit dem voergenantem guet, als in aller pest fueg. Wir glueben auch mit unsern triwen der ee genanten gült recht scherm und gewern sein des vorgenanten gotshauss und der sampnung dacze^c Sand Poelten fuer alle ansprach als aigens recht ist in dem land ze O^esterreich. Dar zue zu ainer pezzern sicherhait, ze rechter ewentewer und ze phant setze wir dem gotshaus dacze^b Sand Poelten unsern hof, der do leit pei Rampsenpach in der pharr ze Chülub dacze^c dem Graben, der unser rechtez aigen ist‚ do man uns von^g dient alle jar an sechzig phenning dreu phunt gelts. Nem aver die sampnung des vorgenanten gotshauss dar uber chainen schaden von ansprach mit raisen oder mit zerung oder mit aribeit‚^h wie getanen schaden seu dez nemen den seu pei iren triwen gesagen moegen, den schulle wir in ab legen an alle wideredⁱ und schullen seu daz haben auf uns und auf allem dem guet daz wir haben in dem land ze O^esterreich, wir sein lemptig oder toed. Und wer fuerst in dem selben land ist der schol seu dez gewaltich machen mit unserm gueten willen an alle widerred. Daz di red stet und unzebrochen weleib, dar uber geb wi^er ich Chuenrat und mein paid suen Chunrat und Leb von Vreuntshausen dem ee genanten gotshaus dacze Sand Poelten disen prief westetigt und versigelt mit unsern insigeln¹ zu ainem offen u^erchund. Diser sache sind auch gezeug: her Cholman von Rampsenpach, Wolfker der Reichensperiger und Jans von Potenprunne mit iren anhangunden insigeln. Der prief ist gegeben seind ergangen warn von Christes gepu^eerd dreuzehenhundert jar dar nach in dem fumf und vierzkistem jar, an unsers herren auffart tag.

Source Fulltext: LAMPEL, Urkunden Sanct Pölten (=FRA I, Wien 1981) S. 370-372