Ich* Lewtold von Chunring obrister schenchk in Osterreich und ich Lewtold von Chunring sein vetter vergehen offenlich mit dem brief und tun kund allen die in sehent oder hornt lesen, das wir durch gots lieb und nach des erbern ritters pet hern Dietmars von Loch die aigenschaft des guets ze Landhawsen pi Albrechtsperig, des funf schilling* phenning gelts sind auf gestiftem guet, die man* dient auf sand Michahelstag, geben haben dem erbern herren maister Petrein chorherrn ze Passaw und pharrer ze Albrechtsperg, der es von seinem aigenhaftem guet chauft hat, und das uns der vorgenant her Dyetmar mit sechs schilling phennig gelts seins rechten aigens dacz Rust widerlegt hat, also das der vorgenant maister Peter oder wem er das geit oder schaft allen iren frummen damit schaffen sullen ab ier sel, gotshausern oder wie si wellent. Und sei wir der vorgenanten aigenschaft des vorgenanten maister Petreins oder wem er es geit oder schaft scherm und gewer fur all ansprach, als aigens recht ist und des lands gewonhait in Osterich.^a Das di red also stet und unzebrochen^b beleib, daruber so gib ich vorgenanter* Lewtold von Chvnring disen brief versiglten^c mit meinem insigil;¹ und wan^d ich Lewtold von Chunring sein vetter aigens insigill nicht hab, verpind ich mich mit mein trewn under des erberen herren insigil hern Stephan von Meyssaw,^e2 dem mich mein vater³ selig enpholhen^f hat, und auch alles das stet ze haben so vor verschriben stat. Der brief ist geben nach Christi gepurd dreuzehenhundert jar in dem acht und vierzigistem jar‚ an sand Urbans tag.

Source Fulltext: LAMPEL, Urkunden Sanct Pölten (=FRA I, Wien 1981) S. 408-409