Ich Mert der Münsser vergich und tün kunt allen den die disen brief lesent oder hörnt lesen, di nu lebent und hernach chunftich sinde, das ich mit meiner erben gueten willen und gunst, mit verdachtem müt, zu der zeit do ich es wol getuen mochte und mit meins perchherren hande herren Virgily des Prawnstorfer verkauft han meinem weingarten der da leit ze Grinczinge in den Lussen, des ain virtail ist, ze nechst der erberen herren weingarten herrn Reinprechts und herrn Fridreichs der prueder von Walsse, da man von dem egenanten meinen weingarten alle jar dient hern Virgily dem Prawstorffer ain halbm emmer weins ze perchrecht und ainen helbling ze voitrecht und nicht mer, den vorgenanten weingarten hann ich recht und redleichen verkauft und geben mit alle dem nucz und recht als ich inn unversprochenleich in perkchrechts gewer her pracht han, umb drew und dreizzig phunt wienner phenning, der ich gar und genzleich gewert pin, den erberen geistleichen herren probst Dietmaren des gotshauses Sande Pölten, herrn Werenharten techent daselbens und herren Otten dem Hagnawr chorherre daselbens und der samnung gemaine desselben gotshauses und allen iren nachkomen furbas ledichleichen und vreileichen ze haben und allen iren frumen damit ze schaffen, verkaufen verseczen und geben swem si wellent an allen iresal. Und wand meinew zwai chinde de ich hann mit meiner ereren hausvrown vron Dyemuten, der got gnade, mit der ich den vorgenanten weingarten erarbait und gechauft hann, Symon und Elspet zu iren jaren noch nicht chomen sinde und auch noch nicht vogtpar sinde da von so hann ich vorgenanter Mert den vorgeschriben^a erbern geistlichen herrn für die egenanten meine zwai chinde recht und redleichen gesaczt mit meins perkherren hant des erbern geistlichen herren pruder Chunrats zu den zeiten abt dacz dem Heiligen Chrewcz meinen weingarten, den ich gekauft hann umb die phenning, da ich den vorgenanten weingarten umb verkauft hann, der gelegen ist ze Gundramstorf am Wartperge und haisset die Pewnt, zenachst dem weingarten der da haisset der Chürniger, da man alle jar von dient den herrn hinz dem Heiligen Chrewcz in iren hof ze Talaren sechs wienner phenning für perkrecht und fur zehent und nicht mer, uber den obgenanten weingarten der da leit ze Grinczing in den Lussen‚ zu rechten geweren und scherme fur alle ansprach, als scherms recht ist und des landes recht ze Osterreich, und auch als lange unz daz die vorgenanten meinew zwai chinde Symon zu seinen jaren chumt und das Elspet vogtpar wirt und sich des oft genanten weingarten ze Grinczing in den Luzzen ganzlich verzeihent und auf gebent mit perchherren hande, als perchrechts recht ist und des landes recht ze Österreich. Wär aber das inn furbas an demselben scherm icht ab gieng, das süllen si haben auf mir obgenanten Merten dem Münsser und auf allen meinen erben und auf allem unserm gut das wir haben in dem lande ze Osterreich, wir sein lebentich oder tode. Und das diser chauf furbas also staet und unzebrochen beleibe und wand ich selber nicht aigens insigils hann‚ darumb so gibe ich in disen brief zu ainem waren urchund und zu ainer ewigen vestung diser sache versigilten mit der vorgenanten meiner perchherrn insiglen des erbern geistleichen herren prüder Chunrats des abts dacz dem Heiligen Chreucz und herren Virgily des Prawnstorfer und mit herrn Sigharts insigil des Prunner, die diser sache gezeug sinde mit iren insiglen. Diser brief ist geben ze Wienne, nach Christes geburd dreuzehenhundert jar darnach in dem acht und virzigistem jar‚ des nachsten eritags nach sand Philips und sande Jacobs tage.

Source Fulltext: LAMPEL, Urkunden Sanct Pölten (=FRA I, Wien 1981) S. 406-408