Ich Ewerhart von Chaczenperg und ich Ulreich der Gnewzz wir verjehen und tun chund allen den die disen brief sehent, lesent oder hornt lesen, die nu lebent und hernach kunftig sind, daz vrow Geysel die Merteins fleischakeren hausfrow von Lengenpach, der got genad, geschaft hat ein viertail unslicz ewichlich ze dienen alle jar an sand Giligen tag hinz unser frawn gen Chaczenperg durch irer und auch aller irr vordern seeln willen, also das dasselb unslid nindert alswo verprennt noch verzert sol werden denn dacz Chaczenperg; des sei wir zeug. Und das disew sach furbas stet und unzebrochen beleib, daruber so geben wir ich Ewerhart von Chaczenperg und ich Vlreich der Gnewzz disen briefe versigelt mit unsern paider anhangunden insigillen. Der sach sind auch zeug: Herwort von Chappell, Seyfrid Lebeins sün von Oczeinstorf, Thoman am perg von Persnichc, Chonrat Mair von Mautterhaim und ander erber leut. Der prief ist geben nach Christi geburde dreuzehenhundert jar darnach in dem zwai und funfzikisten jar, an unser frawn tag zu der schiedung.

Source Fulltext: LAMPEL, Urkunden Sanct Pölten (=FRA I, Wien 1981) S. 439