Ich Zachrey Petreins des Hayder witib und all mein erben verjehen und tuen chunt an disem prief allen den di in sehent oder hoerent lesen, di nu lebent oder her nach chunftig sind, daz di muel, di weilen gewesen ist Andres^a des Moln, di gelegen ist vor der stat ze Sand Poelten an dem Griezz, und diselb muel gehoert mit dem dienst in daz chamer haus ze Sand Poelten, und di selb muel was mich und mein erben an gevallen von des toedes wegen und von meins wierts wegen, di selb muel han ich vor genante Zachrey redleich und recht verchauft mit guetleichem willen aller meiner erben und han auch sei auf gegeben dem Oeder zu den zeiten chamrer datz Sand Poelten, der der selben muel lehen herr ist; und schol auch ich egenante Zachrey und mein erben chain ansprach zu der selben muel nimmer mer gehaben und schullen sei auch scherm fuer alle ansprach, als scherms recht ist in dem lant ze O^esterreich. Daz di red also stet und unzebrochen beleib, han ich vorgenante Zachrey mit sant mein erben gepeten unsern genedigen herren hern Reinprechten von Walsee und Vlreichen den Duerren zu den zeiten puergraff datz Vihoven, daz si der sach zeug sind mit iern insigeln. Der prief ist gegeben nach Christes gepu^erd dreuzehen hundert jar darnach in dem zwai und funfzigistem jar, an sand Peters und sand Pauls tag.

Source Fulltext: LAMPEL, Urkunden Sanct Pölten (=FRA I, Wien 1981) S. 438-439