Wir Gotfrid von gotes genaden bischove ze Passaw bechennen offenlich mit disem brief, das wir unserem getrewn liben Vlrichen dem schreiber unserm burger ze Sand Polten und seiner hausfrawn Chunigunden Petreins Woller tochter, dem got genad, und allen iren eriben verliehen haben den zehent ze Prunsleinsdorf ze rechtem lehen‚ und desselben Woller haus ze Sand Polten ze nagst Petrein dem Würfel, und die zwai lehen‚ ains datz Purgarn und ein phister lehen, den weingarten ze Wolfpaizzing der haist Haug, und funfjeuch hart ackchers ze rechtem purkrecht, als wir von recht solten. Mit urchund diczs briefs, der geben ist ze Sand Polten, an sambstag vor dem swarzen suntag in der vasten, nach Christi gepurd drewzehenhundert jar darnach in dem sechs und funfzigisten jar.

Source Fulltext: LAMPEL, Urkunden Sanct Pölten (=FRA I, Wien 1981) S. 461