Ich Nicla der Rædler von Grueb vergich offenleich mit dem prief allen den di in sehent oder horent lesen, daz ich mit wol verdochtem muet und mit gunst aller meiner erben und nach rat meiner pesten vreunt und ze der zeit do ich iz wol getuen mocht, allen meinen drittæil ze Grueb, gelegen in Hurber pharr, iz sei æigen oder purchrecht, und mit alli^a dev und dorzue gehort, versuecht und unversuecht, gestift und ungestift, ze veld und ze dorf, ze holz und ze wizmat und swie so daz alles genant ist und mit allen den rechten und nuczen und ich iz in æigens und in purchretz^b gewer von alter her pracht hab ich und mein vadern und alz iz mich allez an erstarben ist von vater und von mueter, also hab ich iz alles recht und redleich verchauft meinem lieben prueder Larenczen dem Rædler und seiner hauzzfrawen vrawen Katrein und allen iern eriben umb suben und zwainzichk phunt phenning und umb ein halbs phunt phenning gemæiner wienner munizz, der ich ganz und gar gewert von in pin an allen schaden, und schullen sev auch allen iern frum schaffen mit dem var genanten chauf mit verseczen, mit verchaufen oder geben wem si wellen mit meinem guetleihen willen, an alle mein ierrung. Ich pin auch dez var genanten chaufes ier scherm und ier gwer fuer alle ansprach, alz aigens und purchretz^b recht und chaufes recht ist in dem land ze Osterreich. Næmen sev aver schaden an dem var genanten chaufe mit recht, wie der schad genant wer, den ier aeins gesprechen mag pei seinen triwn ungeswarn, den selben schaden schol ich in wider chern an allen chrieg, und schullen sev auch den selben schaden haben dacz mier und aeuf aller meiner bab dev ich hab in dem lant ze Osterreich und do von bechômen mit meinem guetleihen willen an chlag und an recht, ich sei lebentig oder toed. Daz in di red fuerwaz stæt und unzebrochen beleib, dor uber so gib ich var genanter Nicla der Rædler in den prief versigelten mit meinem anhangunden insigel ze eim worn urchund der sache. Und dez sint gezeug: Stephan der Rædler mein prueder und Alber der Czendel von Grueb und Wernhart der Rædler von Oet mit iern anhangunden insigeln, den di sache wol chunt und gewizzen ist und der wandlung taidinger gewesen sint. Der prief ist geben noch Christi gepu^erd dreuzehen hundert jar und dor noch in dem suben und fumfzkisten jar, an unser vrawn tag ze der chundung.

Source Fulltext: LAMPEL, Urkunden Sanct Pölten (=FRA I, Wien 1981) S. 471-472