Wier Chu^enrat von gotes genaden abpt ze Tegernse und aller convent da selben bechennen offenleichen mit disem brief und tuen chunt allen den die in an sechent hoerent o^eder lesent, das wier mit aigem willen gemainleich und auch nach guetem rat geben und geben haben hern Chunraden unserm techant dar zu^e Hainreichen dem Hohenchircher und Vlreichem dem Stoekchlein unsern richtern vollen gewalt den drein und auch ier iegleichen besunder ze rechten und ze versprechen geistleichs o^eder wertleichs rechten baide ze gewinn und ze flust uns und auch unserm gotzhaus ze Tegernse umb alle die ansprach und sto^ezz die die geistleichen wierdigen herren der brobst von Sand Polten und der von Sand Florian gen uns habent von des zechentz wegen in der Wachawe. Mit u^erchund ditz briefs geben ze Tegernse mit unsern baiden angedruchten insigeln. Geschehen nach Christ gepu^erd dreuzehen hundert jar und dar nach in dem ain und sechzkistem jar, des nachsten freitags vor phingsten.

Source Fulltext: LAMPEL, Urkunden Sanct Pölten (=FRA I, Wien 1981) S. 515-516