die nu lebent oder hernach chunftig sind, das wir mit wolbedachtem müt und mit guetlichen willen, ze der zeit do wir es mit recht wolgetün machten, recht und redlich verkauft haben unsers rechten aigens das wir haben, di gult di hernach geschriben stent und di wir vormals von Jansen von Ekchendorf und von sein erben gechauft haben, anderthalbm müt korn und zwelif schilling wienner phenning gelts gelegen ze Öchstorf auf anderthalbem lehen gestifter gueter und behauster holden, dieselbn gült haben wir verkauft und geben umb zwai und sechzig phunt wiennar phenning, der wir genzlich verricht und gewert sein, dem erbirdigen herrn herren Vlreichen dem Veiertager ze den zeiten brobst des gotczhauss ze Sanndt Polten und dem convent gemainlich doselbs, fürbas lediklich und freilich ze haben und allen iren frumen domit ze schaffen, verkaufen verseczen und geben swem seu wellen an allen krieg und irsall, und sein auch der ir recht gewer und scherm für all ansprach, als aigens und des landes recht ist in Osterreich. Get in furbas daran icht ab mit recht oder ob sew icht krieg oder ansprach daran gewunnen von swem das wёr, das sullen wir inn alles ausrichten, ablegen und widercheren an all irr mue und auch an allen iren schaden, und sullen sew das unverschaidenlich haben auf uns und auf all unserm gütt daz wir haben in dem lande ze Osterreich, wir sein lembtig oder tod. Mit urkund des briefs versigelt mit meinem egenanten Pernolts insigel des Chlingenfurter und mit meins vettern insigel Stephans des Chlingenfürter, ¹ mit Chunrats insigel des Veirtager und mit Petreins insigel des schuczenmaister meins swager, di ich des vleizzikleich gepeten hann, das seu der sach gezeugen sind mit iren insigeln. Der brief ist geben nach Christs gepurd dreuzehenhundert jar darnach in dem drew und sechzigistem jar, des nachsten suntags nach unser frawn tag ze der liechtmess.

Source Fulltext: LAMPEL, Urkunden Sanct Pölten (=FRA I, Wien 1981) S. 566-567