Ich Wu^elfinch der Ebergôzzinger und ich Katrey^a sein hausvrowe, ich Stephan der Ebergôzzinger sein pru^eder und alle unser erben tuen chunt offenleich mit dem prief, daz wir recht und redleich verchauft haben unsers rechten aigens daz wir haben ain viertail ains hofs gelegen ze Chappellen, da ze den zeiten Herbort aufgesezzen ist, mit alle dew und dar zu geho^ert, wie daz genant ist oder wo so daz gelegen ist, da von man alle jar dient fumf schilling wienner phenning minner fumf phenning; das selb viertail hofs^b haben wir verchauft und geben den erwirdigen herren hern Vlreichen dem Veyrtager ze den zeiten probst ze Sand Pölten und dem convent da selbs zu der ersten mezze umb neun phunt und sechzig phenning wienner muenz, der seu uns gënzleich gewert haben, also daz sev daz furbaz ledichleich haben sullen und allen irn frumen da mit schaffen an allen chrieg; und sein auch wir des ir recht gewer und scherm als aigens und des lands recht ist in O^esterreich. Get in awer furbaz dar an icht ab mit recht, daz schullen sev haben auf uns und auf alle unserm gut, daz wir haben in dem lande ze Osterreich‚ wir sein lebntig oder tod. Mit urchund des priefs versigilt mit unser egenanten paiden Wulfings und Stephans der Ebergôzzinger insigiln und mit unsers oechaims insigil Hainreichs des Heusler, den wir des fleizzichleich gepeten haben, daz er dieser sache zeug ist mit seinem insigil. Geben an sand Pauls tag ze der cherung, nach Christi gepu^erte dreuzechen hundert jar dar nach in dem drew und sechzigistem jar.

Source Fulltext: LAMPEL, Urkunden Sanct Pölten (=FRA I, Wien 1981) S. 559