Ich Chuenrat von Orberkch, ich Elspet sein hausfrawe, ich Off sein sun und all unser erben vergehen und tuen chunt offenlich mit dem brief, daz wier mit gueter voerbetrachtung und mit guetlichem willen, ze der zeit do wier es mit recht wol getuen machten, recht und redlich verchauft haben unsers rechten aigens daz wier haben, zehen schilling wiennaer phenning geltes gelegen in dem Chreuspach auf ainem hof genant datz den Hofern, do ze der zeit Chunrat aufgesezzen ist; dasselbig gelt haben wier verchauft umb achtzehen phunt wienner phenning, der wier genzlich verricht und gebert sein, den erberdigen geistlichen herren hern Vlreichen dem Veyrtager probst ze Sand Poelten und dem convent gemainlich doselbs fuerbas ledichlich und vreilich ze haben und allen iren frumen do mit ze schaffen, verchaufen versetzen und geben wem si wellen an allen iersal. Ouch sein wier des ier recht geber und scherm fuer all ansprach, als aigens und des lantz recht ist in Oesterreich. Gêt in fuerbas daran icht ab mit recht, oder ob si icht chrieg oder ansprach daran gebuennen, von wem das wer, das schuellen wier in allez ausrichten an allen iern schaden, und schuellen si das haben auf uns und auf allem unserm guet, daz wier haben in dem land ze Oesterreich, wier sein lebentig oder toed. Mit urchunt des briefs, versiglt mit mein obgenanten Chuenrates insigel von Orberch und mit mein Offen insigel seins sun und mit hern Ru^edolfs insigel von Losenstain^a2 und mit Pernolts insigel des Chlingenfuerter, di wier des vleizzichlich gepeten haben, daz si der sach zeugen sind mit irn insigellen. Der brief ist geben nach Christes gepuert drewzehen hundert jar darnach in dem vier und sechzgistem jar, an sant Agnesen tag.

Source Fulltext: LAMPEL, Urkunden Sanct Pölten (=FRA I, Wien 1981) S. 583