Ich Thoman der smid von Veylndorf, ich Margret sein haus frawe Leupoltes tachter von Veylndorf und unser erben tuen kunt offenlich mit dem brief umb den hof ze Veylndorf und was dar zue gehoert und dar zu dem gotzhaus datz Sant Poelten gehoert, den der vorgenant Leupolt mein egenanten Margreten vater halben hat und des ich Thoman ain viertail han und des Philipp selig mein obge nanten Margrete prueder ain viertail gehabt hat, daz er umb aecht phunt phenning mit herrenhant versatzt hat, denselben ganzen hof mit seiner zuegehoerung haben wier verchauft dem erbern mann Iernfriden von Ratmanstorf umb fuemf und dreizzich phunt phenning, der gevallen sind aecht phunt fuer das viertail daz der egenant Philipp versatzt het, und der auch gevallen sind fuer des Huerneinn Seifritz¹ totslag dem lantrichter und desselben Seifritz vreunden ze pezzerung aindlef phunt und unserm herren dem probst datz Sant Poelten fuer seine recht und voerderung vier phunt; aber umb di uebrigen zwelf phunt phenning haben wier uns ich Thoman und ich Margret sein hausfraw lieplich und vreuntlich verrichtet mit dem egenanten Leupolten von Veylndorf, also daz demselben Leupolten gevallent sechs phunt phenning und uns sechs phunt phenning, und sol ieglicher tail mit seinem gelt allen seinen frumen schaffen, also daz ieglicher tail hinz dem andern nicht ze sprechen noch ze voerdern darumb haben süllen vil noch wenich; und wenne wier nicht aigens insigels haben, so geb wier den brief zu ainem offen urchunt der sach versiglt mit unsers herren insigel des erbern herren hern Ulreichs probst ze Sant Poelten² und mit Pernoltes des Chlingenfuerter, di wier des vleizzichlich gepeten haben, daz si der sach zeugen sind mit iern insigeln, darunter wier uns verpinten mit unsern trewn als das stet ze haben daz voer geschriben stet. Geben nach Christes gepu^erd dreuzehen hundert jar darnach in dem fuemf und sechtzgisten jare, des nachsten suntags nach dem phingst tag.

Source Fulltext: LAMPEL, Urkunden Sanct Pölten (=FRA I, Wien 1981) S. 629-630