Ich Hadmar der Ris von Hurrben, ich Margret sein hausvrowe und unser eriben tuen chunt, das wier recht und redleich verchouft haben und geben umb drithalb phunt wienner phenning, der wier verricht sein, dem erbern herren hern Vlreichen probst datz Sand Poelten und dem convent da selben zwen und sibenzig wienner phenning geltes, di in unsern hof datz Huerrben gehoert habent, das alles unser lehen ist von dem gotzhaus datz Sand Poelten. Und sind der gelegen auf Otten des smides hofstat datz Hurben an zwen dreizzig phenning^a und vierzehen phenning auf Stephann des Tawbenwancher und Chunrat des schuester akcher und dreizzig phening auf Micheln des schuester akcher und wis. Und schullen si das fuerbas haben und iern frumen da mit schaffen, verchoufen versetzen geben wem si wellent; und sein des ier scherm und gewer fuer all ansprach. Get in dar an icht ab mit recht, das schullen si haben auf uns und unserm guet, wier sein lebentig oder tod. Mit u^erchund des briefs versigelt mit der erbern Wernharts des Redler¹ und Albrechts des Zenndlein² insigeln, di des zeug sind mit iern insigeln, wann wier aigner insigel nicht haben; darunder wier uns verpinden mit unsern trewn stet ze haben das vorgeschrieben stet. Geben an unser vrowen tag zu der liechtmezz, von Christes gepu^erd dreuzehen hundert jar in dem siben und sechzigistem jar.

Source Fulltext: LAMPEL, Urkunden Sanct Pölten (=FRA I, Wien 1981) S. 672-673