Nos Albertus dei et apostolice sedis gracia episcopus Pataviensis universis tenore presentium significamus, quod ad nostram accedentes presentiam venerabilis nobis dilectus in Christo Vlricus prepositus monasterii sancti Ypoliti ordinis sancti Augustini canonicorum regularium nostre diocesis, Cristoforus decanus omnesque et singuli canonici de conventu eiusdem humiliter suplicarunt^a ut donationem et alienationem iuris patronatus ecclesię sancti Michaelis in Haunolt stain ad ipsos et eorum monasterium tunc de iure pertinentis^b ab ipsis factam generoso et nobili viro Marchardo dicto Turß de Tyrn stain suisque heredibus approbare laudare et confirmare auctoritate ordinaria dignaremur, sue donationis ac alienationis causas infrascriptas allegantes: primo quia eadem ecclesia in Haunoltstain per memoratum Marchardum melius et efficatius quam per eos in iuribus ipsius uni versis defensari atque tueri posset; tum eciam quiam cultum divinum in ipsa augmentare per secundum sacerdotem promiserit; tum etiam quia eis predicta donatione lites contentiones et rixe, quas incessanter memorati prepositus et conventus ac Marchardus sepe dictus inter se hactenus habuerunt propter eandem ecclesiam, radicitus tollerentur. Quia vero eorum petitio continebat^c quod iustum est pariter et honestum, tam vigor equitatis quam ordo suggerit rationis, ut per sollicitudinem officii nostri ad effectum optatum et debitum perducatur; idcirco predictam, donationem ex causis prescriptis tanquam iustis et racionabilibus modo prescripto factam matura deliberatione et diligenti inquisitione prius facta approbamus laudamus imo eandem ex certa scientia auctoritate nostra ordinaria confirmamus harum testimonio littera rum impensione nostri sigilli munitarum. Datum in Sancto Ypolito, 17 die mensis iunii, anno domini 1367.

Source Fulltext: LAMPEL, Urkunden Sanct Pölten (=FRA I, Wien 1981) S. 685-686