Wier Albrecht von gotes genaden pischof ze Pazzoew bechennen und tuen chunt offenlich mit dem brief fuer uns und all unser nachkoemen ewichleich, das wier mit wolbedachtem muet rat und vorbetrachtung, z'der zeit do wier es mit recht wol getuen mochten, von unsern und unsers gotzhaus wegen zu ainem rechten auswechsel gegeben haben nuserm lieben in got U^elreichem probst ze Sand Poelten, seinem convent und seinem gotzhaus da selbes di manschaft und aigenschaft der nachgeschriben zehent, di uns und unser gotzhaus angehört habent und di Mertt der Wiser unser purger ze Sand Polten z'der zeit hat und von uns und unserm gotzhaws ze lehen gehabt hat, di gelegen sind ze Foellderndorf auf zwain hoefen und auf vier und vierzigk puerkchrecht aekchern enhalb und auch hindis halb der Pielach, und ain chlains zehentel gelegen ze Wietzendorf auf zwain lehen fuerbas in manschaft und aigenschafts^a weis ze haben und allen iern und iers gotzhaus frumen da mit schaffen, wi es in fueget an allen ierrsal. Da fuer habent si uns unserm gotzhaws und unsern nachkoemen ausgewechselt und gegeben di manschaft und aigenschaft der zehent datz Maentzleinstorf, datz Willdenstain, datz Zelking und anderswo wo dew umb Zelking gelegen sind, als si Uerschalich gefuert hat, di von alter si und ier gotzhaus angehoert habent, davon si^b ze mittern jarn pei sechs mutten traides bechoemen muegen, wann auch si vormals diselben zehent den ersamen und edeln Stephann und Hainreichen pruedern von Zelking gegeben habent, also das si die von uns und unserm gotzhaus ze lehen haben scholten, und habent auch den von uns nu ze lehen enphangen. Und sein wier und unser nachkoemen der obgenanten zehent, di wier in da fuer gegeben haben, ier und iers gotzhaus recht scherm fuer all ansprach, als aigens und des landes recht ist in Osterreich. Get in dar an icht ab mit recht, daz schullen si haben datz uns unsern nachkoemen und auf allen den guetern di wier in dem land ze Osterreich haben. Mit u^erchund des briefs besigelten mit unserm grozzen anhangenden insigel, geben datz Sand Poelten, an sand Peter und sand Pauls tag, nach Christes gepu^erde drewzehen hundert jar darnach in dem siben und sechzigistem jare.

Source Fulltext: LAMPEL, Urkunden Sanct Pölten (=FRA I, Wien 1981) S. 687-688