Dem edlen und hochgeworen fürsten unserm lieben genedigen herrn herzog Albrecht ze Osterrich ze Steir ze Kernden und ze Krain graffen ze Tirol embieten wir, ich Ulreich, Symon und Jans prueder unsern getrewn dienst. Gnediger herr, wir lassen ew wissen umb unser vischwaid dacz Engelstorf und bei dem Pielachof gelegen auf der Pielach di wir von ew ze lehen gehabt haben, daz wir die verkauft und geben haben dem erwirdigen geistlichen herrn herrn Ulreichen probst dacz Sand Polten seinem convent daselbs und allen iren nachkomen, und senden ew die mit dem offen brief auf zu ewern handen. Versiglt mit unser obgenanten Ulreich und Symons des Pielaher insigil. Wann ich obgenanter Jans der Pielacher selb aigens insigils nicht enhan, darumb verpind ich mich under meiner pruder insigil mit meinen trewn alles das genzlich stet ze haben das vor geschriben stet. Geben dacz Sand Polten, an sand Jacobs abent, nach Christi gepurd dreuzehundert jar darnach in dem acht und sechzigistem jare.

Source Fulltext: LAMPEL, Urkunden Sanct Pölten (=FRA II, Wien 1901) S. 30-31