Wi^er Agnes von gotes genaden abptessinn des gotzhaus datz Erlachloster und wi^er der convent gemainlich da selbes vergehen und tuen chunt offenlich mit dem brief allen den di in ansehent oder ho^ernt lesen, di nu lebent und hernach chu^emftig sind, das wi^er mit gemainem rat und unser aller gu^etlichem willen und gunst recht und redlicb verchouft und ze choufen gegeben haben dem erwi^erdigen herren hern U^elreichen dem Veirtager probst des gotzhaus datz Sand Po^elten, seinem convent, seinem goczhaus und seinen nachko^emen unsrew aignew lehenschaft und manschaft aines hofs genant der Zikchof in Grafendorffer pharr gelegen, des Niclas der Zikch und Dyetreich sein pru^eder drew vi^ertail und Dytreich der Snaitpekch ain vi^ertail von uns und unserm gotzhaus ze lehen gehabt habent, und alles des daz in den selben hof und zu dem hof geho^ert und alles des daz di egenanten di Zikchen und der Snaitpekch von uns ze lehen gehabt habent, umb zwelf phunt wienner phenning, der si uns genzlich verricht und gewert habent, und schullen sew di selben aigenschaft, lehenschaft und manschaft fu^erbas ledichleich und freileich haben und allen i^ern frumen da mit schaffen, wie in daz fu^eg an allen i^errsal. Und sein der i^er recht gewer und scherm fu^er alle ansprach, als aigens und des landes recht ist in O^esterrich. Get in fu^erbas dar an icht ab mit recht, daz schullen wi^er in ausrichten und widercheren, und schullen si daz haben auf uns und auf allen unsers gotzhaus guetern^a wo wi^er di haben. Des ze u^erchu^end geb wi^er den brief besigelt mit unsern paiden anhangunden insigeln. Geben ze Erlachloster, an sand Cholmans tag, nach Christes gepu^erd dreuzehen hundert jar darnach in dem a^echt und sechzigistem jar.

Source Fulltext: LAMPEL, Urkunden Sanct Pölten (=FRA II, Wien 1901) S. 42