lch Volchwein der Plu^eem, ich Kathrey sein hausvro^ew, ich Nicla, ich Andre pru^eder di Plu^emen sein su^en und all unser erben vergehen und tu^en chu^ent offenlich mit dem brief allen den dï in sehent oder ho^ernt lesen di nu lebent und hernach chünftig sind, daz wïr mit guetem willen mit wolbedachtem muet mit gesampter hant und gunst aller unserer erben, zder zeit da wir ez mit recht wol getu^en machten, recht und redlich verchau^eft habeîi unsers rechten ledigen vrein aigens unsrew zwai lehen, di wir gehabt haben datz Pergaren ze nachst der linden bei dem haspan, da auf gesezzen sind auf ainem lehen Ott der Weintzu^erl und auf dem andern lehen Peter und alles das daz dar zu^e geho^ert ze veld und ze dorf, es sei gestift oder ungestift, versu^eecht oder unverschu^echt,^a wie daz genant ist und wo daz alles gelegen ist, da man järlich von di^ent zehen schilling wienner phenning geltes. Darnach haben wi^er verchauft ainen weingarten gelegen daselbs datz Pergaren, den Ott der Weintzu^erl in daz obgenant sein lehen ze weinzu^erlgericht pawt und als er den unz auf den heutigen tag her gepawet hat, mit allen den rechten als der vorgenant weingarten von alter hercho^emen ist, und daz alles gelegen ist in sand Christoffen pharr. Di vorgenanten zwai lehen und den weingarten mit allen ërn nu^eczen und rechten, als wi^er di^e in aigens gewer innegehabt und herpracht haben an all eribvogtei, haben wir verchau^eft und geben umb si^ebenthalbs und zwainzig phunt wienner phenning, der wir gar und gänzlich verricht und gewert sein, dem erwi^erdigen und geistlichem herren hern Ulreichen dem Veyrtager probst dez gotzhau^es datz sand Po^elten seinem convent und allen seinen nachko^emen fu^erwas ledichlich und vreilich ze haben und allen irn fru^emen damit schaffen, verchau^efen versetzen und gewen wem si wellent, an allen chrieg und i^ersal; und sein wir des i^er recht geweren und scherm fu^er all ansprach als aigens und des landes recht ist in O^esterrich. Get in furbas daran icht ab mit recht oder ob si mit recht icht chrieg oder ansprach daran gewu^ennen, von wem daz wêr, daz su^ellen wi^er in gänzlich ausrichten ablegen und widerchern und sullen si daz haben dacz uns unverschaidenlich und auf all dem gu^et daz wi^er haben in dem lande ze Österreich, wi^er sein lebent oder tod. Mit urchund des briefs besigilten mit mein obgenanten Volchweins insigil des Plu^eemen und mit Niclasen insigil meines sun, mit Otten insigil des Pomer und U^elreichs insigil des Chlingen, di wi^er des vleizzichlich gepeten haben, daz si der sach zeu^egen sind mit irn insigilen; wand ich obgenanter Andre des Plu^eemen sun selb aigens insigils nicht enhet, so verpind ich mich mit meinen trewn u^ender di^e gegenwu^ertigen insigil, alles daz gënzlich stât ze haben und ze volfürn daz vorgeschriben stet. Geben datz Sand Po^elten, nach Christi gepurd dreu^ezehen hundert jar darnach in dem na^eun und sechzgistem jar, an sand Philipps und sand Jacobs tag der heiligen zwelfpoten.

Source Fulltext: LAMPEL, Urkunden Sanct Pölten (=FRA II, Wien 1901) S. 63-65