Ich Chunrat der Veyrtager und ich Janns der Veyrtager sein prueder und all unser erben vergehen offenlich mit dem brif und tün chunt allen den di inn sehent hörnt oder lesent, di nu lebent oder hernach chunftich werdent, daz wir uns gen dem erwirdigen herrn herren Johannsen probst dacz Sannd Po^elten, seinem convent und allen iren nachko^emen mit unsern trewn verlubt und verpunden haben und verhaissen auch mit dem brif umb die vischwaid auf der Pielach, di gen Renharczsdorf und gen Fridaw gehornt, die wir von unseren genedigen herrn den grafen von Maidburg ze lehen in unsern hanten haben ze getrewr hant, wann das ist daz sew oder ander iemant von iren wegen mit irem brif di an uns vodernt, das wir inn die oder wem si die aufgeben haizzent unverzogenlich mit aines igleichen rechten lehenherren hant aufgeben schüllen; daz lüben wir mit unseren trewn angevär. Der sach ze urchund geben wir den brif versigelten mit unseren baiden anhangunden insigln; des ist auch gezeug unser lieber frewnt Pernolt der Chlingenfürter mit seim anhangunden insigl. Der brif ist geben ze Sand Pölten, do man zalt von Christi gepurd dreuzehen hundert jar darnach in dem sibenzkistem jare, an dem ersten suntag in der vasten.

Source Fulltext: LAMPEL, Urkunden Sanct Pölten (=FRA II, Wien 1901) S. 74