Ich Chu^enrat der Veyrtager und all mein eriben vergehen und tu^en chunt offenlich mit dem brief allen den di in sehent ho^ernt oder lesent, di nu lebent und hernach chumftig sind, daz wi^er uns liebleich und vreuntleich verricht und veraint haben nach erberr leut rat, di wi^er dar zu^e genomen haben, mit dem erwi^erdigen geistleichen herren hern Johansen probst des gotzhaus datz Sandpo^elten und mit seinem convent da selbs um das gescheft so uns unser lieber herr und vreunt her U^elreich der Veyrtager selig weilnt probst des obgenanten gotzhaus datz Sandpo^elten geschaft het: von erst umb di zehent datz Emmerstorf und ze Weyten und umb ainen brief der uber diselben zechent sagt, darnach umb die vest ze Inning und waz dar zue geho^ert, darnach umb ettlich chlaineid und varundgu^et daz uns auch der obgenant her Ulreich probst der Veyrtager selig gemaint het, darnach umb alles daz gu^et eribgu^et und varundgu^et daz Rasph der Veyrtager selig hern Hertneyden seinem sun lazzen hat‚ und umb als anders gu^et, wie daz an den selben hern Hertneyden becho^emmen ist. Umb di vorgenanten gu^eter alle di wi^er an sew gevodert haben, haben wi^er uns mit dem egenanten hern Johansen probst und dem convent datz Sandpo^elten verricht, also daz erber leut, di wi^er paidenthalben dar zu^e genomen haben, mit dem rechten bechant erfunden und gesprochen habent, daz mich obgenanten Chu^enraten den Veyrtager, mein prueder di Veyrtager und unser eriben di egenanten zehent ze Emmerstorf und ze Weyten, di veste ze Inning und was dar zu^e geho^ert, di chlaineid und varundgu^et, so vorgenant ist, und des egenanten herrn Hertneyts gu^et und auch all bri^ef di u^eber diselben gu^eter sagent, nicht angeho^erten noch angevallen solten; dar zu^e so wellen noch schullen wi^er umb di selben gu^eter und bri^ef alle hinz in, hinz i^erm gotzhaus noch hinz i^ern nachko^emen fu^erbas dhainerlaie vodrung noch zu^espru^eche haben noch gewinnen, in dhainem weg, vil noch wenikch. Darnach habent die obgenanten erber leut, di unser taidinger gewesen sind, gesprochen, daz mi^er Chu^enraten dem Veyrtager und meinen eriben von dem egenanten herrn Johansen und dem convent datz Sandpo^elten fu^er di schêden di ich genomen han von dem bestant des hofs ze Pulka, den ich zwai jar von in bestanden het, gevallen schullen zwai hundert phunt wienner phening, di si uns geben schullen, hundert phund phening an sand Merteins tag der schierist chumt und hundert phunt phening an sand Go^erigen tag der darnach schierist chumt unverzogenlich. Wer aber daz si uns di hundert phunt phenning di uns auf den egenanten sand Go^erigen tag gevallen schu^ellen, nicht geben wolten oder mo^echten, so schullen wi^er di darnach||
gestên lazzen ain ganzes jar an allen schaden, so beschaidenlich daz si uns dasselb jar zehen phunt wienner phening davon dienen schullen; und wenn daz jar auzchumpt, so schullen si uns der selben hundert phunt phening richten unverzogenlich. Auch habent si gesprochen von der selben scha^eden wegen umb di vier und vi^erzigk phunt phenning der ich dem gotzhaus datz Sandpo^elten schuldig was, daz ich der ledig sein schull, und schol mi^er der obgenant her Johans probst datz Sandpo^elten den geltbri^ef wider geben der uber daz selb gelt sagt. Wer aber daz er in seiner gewalt icht geltbri^ef hiet oder fund, di im und seinem gotzhaus sagten, umb welicherlai geltschuld das wêr das ich in schuldig belib, das di selben geltbrief fu^erbas all tode und ze nichte sein schullen. Darnach so verpind ich mich obgenanter Chunrat der Veyrtager fu^er mich und mein pru^eder und fu^er unser eriben, daz wi^er fu^erbas hinz dem egenanten gotzhaus datz Sandpo^elten umb dhainerlai ander gu^eter von des egenanten unsers herrn probst Vlreichs datz Sandpo^elten wegen, dem got genad, wie so di genant sind dhain ansprach haben noch gewinnen schullen in dhainem weg vil noch wenikch. Des ze u^erchu^end gib ich obgenanter Chu^enrat der Veyrtager dem obgenanten herrn Johansen probst und dem convent datz Sandpo^elten und allen i^ern nachko^emen den bri^ef besigelten mit meinem insigel. Der sache sind gezeugen Jans der Veyrtager, Pernnolt der Chlingenfu^erter und Mert ze den zeiten amptman datz Sandpo^elten mit îrn insigeln, di wi^er darumb vleizzichlich gepeten haben, daz si der sache zeugen sind mit i^ern insigeln. Geben des sunntags in der ersten vastwochen in der vasten, nach Christi gepu^erd dreuzehen hundert jar darnach in dem sibenzigistem jar.

Source Fulltext: LAMPEL, Urkunden Sanct Pölten (=FRA II, Wien 1901) S. 74-76