Wür Johanns von gottes gnaden brobst deß goczhaus zue Sanndt Po^elten und wür der ganz convent gemainglich daselbs bekhennen und thuen khunt offentlich mit disem brieff daß unß die erbaren herren her Joring^a und Mert gebrüeder die Rädler von Sichtenberg mit aller irr erben gunst und willen recht und redlich gegeben haben auf unser oblay ain pfunt wienner pfenning gelts gelegen zue Eblesau in Haunoldtstainer pfar auf Wolffharts halben legen,² das sunderlich dient zue der vest zue Wolffstain vier pfenning zue vogtrecht, und ein halbs pfund wienner phenning gelts daselbs auf ainen tagwerkh wißmadtß, darnach ainen weingarten zu Nustorff gelegen bei Reycherstorf, das alleß recht aigen ist und das von herren Ortolffenb dem Goldeckcher und herrn Hannsen dern Goldeckher seinern sun seligen an sie khomen ist. Die selben gült und güeter und alleß das darzue gehört, haben sie unß und unserem gottßhaus * gegeben, so beschaidenlich das wür der eegenanten herren Ortolffes^b und herrn Hannsen der Goldeckcher seeln und allen ieren vordern seeln zue hilf und zue trost järlich begen sollen in unserem gottßhaus ainen jartag deß nägsten montagß nach den ostern feiertagen deß abents mit gesungner vigily, und an dem erichtag darnach mit gesungner seelmessen, mit geleut, mit liechten und mit andern loblichen gewonhaiten, alß in unserm gottßhaus sit und gewonhait ist. Wier sollen auch mit den vorgenanten gülten und güettern allen unseren fromben schaffen wie unß das woll khöm^c und fueg an allen irsal.^d Wann aber wi^er deß jartagß * nit begiengen in der maß alß vorgeschriben stet, so sollen sie und all ier erben vollen gewalt haben * zue underwinden der eegenanten gilt und güeter und dieselbigen inhaben alß lang das wider pracht werde.**³ Mit urkhunt ditß prieffß versilgeten mit unseren zwain grossen anhangenden insigln. Geben zu Sandt Polten, nach Christi gepurth dreizehen hundert jar darnach in dem sibenzigistem jar des mittichen an sant Augustinus tag.

Source Fulltext: LAMPEL, Urkunden Sanct Pölten (=FRA II, Wien 1901) S. 91-92