Albertus dei et apostolice sedis gracia episcopus Pataviensis omnibus imperpetuum. Sane oblata nobis venerabilis in Christo Johannis prepositi monasterii sancti Ypoliti ordinis sancti Augustini canonicorum regularium nostrarum civitatis et diocesis ex una, et dilecti in Christo Petri de Remago rectoris parrochialis ecclesie in Hurben eiusdem nostre diocesis parte ex altera peticio continebat quod, cum ipsi ex certis causis et motivis racionabilibus ac alias pro bono pacis et concordie de et super ecclesia in Hawnoltstain et quadam area adiacente eidem, que alias filiali subieccione sub onere duarum librarum denariorum wiennensium pensionis annue ad ipsam ecclesiam in Hurben pertinuisse dinoscitur cum suis decimis et pertinenciis quibuscunque, ac super ecclesia sancti Gothardi dicte nostre diocesis, que alias ad dictum monasterium sancti Ypoliti pertinuit pleno iure, a qua idem monasterium in signum subieccionis nomine census annui duas libras denariorum eiusdem monete vel duas urnas butiri annis singulis percepit, maturo prehabito consilio taliter mutuo duxerunt ordinandum, quod vice id est loco ecclesie in Haunoltstain dicta ecclesia sancti Gothardi cum suis iuribus, videlicet lignetis pascuis et aliis pertinenciis quibuscunque, filiali subieccione sub onere eciam prioris sue annue pensionis de ipsa ecclesie in Hurben annuo persolvende ac eciam tercia pars decimarum in Inning apud dictam ecclesiam in Hurben, ad quam huiusmodi decime in Inning alias spectarunt, ecclesia vero in Hawnoltstain in via permutacionis de ispis facte in iure patronatus nobilis viri Marchardi dicti Turs suorumque heredum deinceps perpetuis temporibus debeant permanere, ita tamen quod ius patronatus seu presentandi rectorem dicte ecclesie filialis sancti Gothardi ad rectorem parrochialis ecclesie in Hurben, qui pro tempore fuerit, presentacio autem ecclesie in Haunoltstain ad dictum Turs et suos ut premittitur heredes, institucio vero et annuarum cure commissio ipsarum ad nos et successores nostros perpetuo spectare debent et pertinere, ordinacionem inter eos concorditer et unanimiter modo prescripto factam et initam laudare et approbare ac auctoritate ordinaria confirmare dignaremur. Nos qui subditis nostris de pacis et utilitatis comodo providere iugiter affectamus, iustis et racionabilibus ipsorum precibus in hac parte favorabiliter inclinati, ordinacionem predictam tamquam proinde factam et attemptatam cum omnibus suis ut pretangitur modis clausulis et condicionibus ratam et gratam habentes, ipsam in forma petita laudamus approbamus et auctoritate ordinaria ex certa sciencia confirmamus ac robur habere decernimus perpetue firmitatis. In cuius rei evidens testimonium presentes damus litteras sigilli nostri munimine roboratas. Datum in Sancto Ypolito, die penultima mensis julii, anno domini millesimo trecentesimo septuagesimo primo.

Source Fulltext: LAMPEL, Urkunden Sanct Pölten (=FRA II, Wien 1901) S. 109-110