Ich Haydenreich von Meyssaw die zeit landmarschalich in Ostereich vergich und tun chund an dem brief umb all die chrieg stozz und mishelung die die erwirdigen geistlichen herren brobst Jans und der convent datz Sand Polten und brobst Weygant und der convent all an ainem tail, und di leut di der brobst von Sandpolten von den Tewtschen herren ze Wienn gechauft hat, die gesessen sind in der Wochaw, an dem anderen tail von des dienst und zehents wegen der den geistlichen herren von in versessen ist‚ darumb si an paiden tailen chriegig und stossig gewesen sind, derselben chrieg stozz und misshelung sind sew ze paider seit genzlich und gar hinder mich gegangen, was ich daruber sprëch, das sew das paidenthalben sta^et wollent haben. Nu hab ich gesprochen und sprich auch mit dem brief, das di obgenanten leut, die auf den gueteren sind gesessen und innhabent es sei heuser oder weingerten, ze rechtem dienst. dienen sullen dem brobst und dem convent datz Sand Polten all jar jerlich vierdhalb phund wienner phenning auf sand Michels tag und sullen auch iren rechten zehend von allen iren weingerten jerlich geben und raihen als ander ir umbsessen ze paiden gotsheysern^a. Es sullen auch mein purggraffen paid von Chrembs und von Tyrnstain² den obgenanten dienst anlegen auf die obgenanten gueter und weingerten, wo es sew rechtlich und pilleich zimpt nach der umbsäczen rat, und der ander dienst sol aller absein, als ir chaufbrief sagt. Und des zu urchund gib ich in den offen brief, versigilt mit meinem anhangunden insigil. Geben ze Chrembs, nach Christi gepurd dreuzehenhundert jar darnach in dem zwai und sibenzigistem jar, an dem heiligen ebenweichtag.

Source Fulltext: LAMPEL, Urkunden Sanct Pölten (=FRA II, Wien 1901) S. 114-115