Ich Hanns der Friczenstorfer ze den zeiten purggraf ze Chrembs und ich Chunrad der Friczenstorfer die zeit purggraf ze Tyrnstain und ich Ulreich von Wochaw verjehen, offenlich mit dem brief, das unser genediger herre her Haydenreich von Meyssaw z´den zeiten landmarschalch^a in Ostereich,^b mit uns geschaft hat, das wir den dienst solten aufseczen, darumb er gesprochen hat zwischen den^c erwirdigen geistleichen herren hern Johansen brobst datz Sand Polten und hern Weygand brobst datz Sand Florian und ir baider convent an ainem tail und der Tewtschen herren holden in dem tal ze Wochaw, die di obgenanten geistlich herren von in gechauft habent, an dem anderen tail, als ir baider spruchbrief gen einander lautent und sagent. Das haben wir getan nach rat der vier umbseczen Merttn des Neupekchen, Chunrads des Flannder, Petreins von Puhel und Hermans des Wunder und haben den nachgeschriben holden iren dienst aufgesaczt den si den egenanten herren von Sand Polten und von Sand Florian jerlich raihen und geben sullen an sand Merten tag unverzogenlich mit sampt der anlait und ablait, der si auch gepunden sind ze geben: von erst die Preschingün von ainem weingarten am Egenweg genant der Wirsing, und von ainem lehen zenagst Agmünder hof gelegen zehen schilling und achzehen phennig diensts, und ze anlait und ablait funfczehen phening; Albrecht Vogler von ainem weingarten ain halbs phund und zwen und vierzig phenning diensts, und ze anlait und ablait zehen phening; Christan Hawnolt von aim weingarten an dem Mitterekch sechzig phennig dinsts und ze anlait und ablait zehen phening; Gannser^d von ainem weingarten am Mitterekch ze nagst des Chramer weingarten sechzig phening diensts, und ze anlait und ze ablait zehen phenning diensts^e; Purchkstaler von ainem weingarten genant der Hymler ain phund phenning diensts, und ze anlait und ablait funfzehen phenning; und sullen auch denselben dienst auf den egenanten sand Mertten tag den obgenanten herren von Sand Polten und von Sand Florian unverzogenlich dienen. Teten si aber des nicht, so sullen si sew darumb phenden und nötten als ander ir holden umb ir versezzens purkrecht. Darnach sprechen wir, wer das under in nicht hielt stët und uberfür das vorgeschriben stët, der ist unser frawn von Waltse ze Tyrnstain dreissig phund phening und iglichen spruchmann aines phunds wienner phenning vervallen und darzu den purgeren in der Wochaw ains emer weins, des pesten den man daselbs vinden mag. Das der spruch und die handlung also stet und unzebrochen beleib, daruber so geben wir den brief versigilten mit unsern anhangunden insiglen, uns an schaden. Geben nach Christi gepurde tausent drewhundert jar darnach in dem zwai und sibenzigistem jar, an sand Augustins tag.

Source Fulltext: LAMPEL, Urkunden Sanct Pölten (=FRA II, Wien 1901) S. 132-133