Ich Fridreich ze den zeiten pharrer ze Weinberkch vergich fuer mich und fu^er alle mein nachko^emen pharrer daselbs und tu^en chunt offenlich mit dem brief allen den di in sehent oder ho^ernt lesen, di nu lebent und hernach chu^enftig sind, das di edel ersam vrowe vrowe Dymu^et hern Hermanns seligen von Landberch witib, ze den zeiten der hochgeporn fu^erstinn der herzoginn ze O^esterreich etc. hofmaistrinn, mit wolbedachten mu^et und mit gunst aller i^erer eriben durich got, i^er selbs und aller îrer vordern seln hails willen gewidempt und gegeben hat zu der vorgenanten meiner chirhen ze Weinberch und ainem igleichem pharrer da selbs ewichleich umb ain mezz und ainen jartag und ein ewigs liecht, alz hernach an dem bri^ef geschriben stet, i^ers ledigen gu^etes, das si wittibenweis umb i^er verdientes varundgu^et gechouft hat, sechzehenthalb phunt und vi^er und zwainzig phenning wienner mu^enzz geltes, di gelegen sind:² von erst fu^emf phunt und fu^emf und sechzig phenning geltes auf dem Petersberg in Chulber pharr auf behaustem gu^et, di si von dem Sesnagel gechouft hat, darauf zu den zeiten di hernach benanten holden gesezzen sind: U^elreich der Mai^er, Fridreich Praun,^a Chunrat der Greynër, Weikchart di Chaisrinn, Fridreich der Rigler und di alt Dymuet; und drew phunt geltes di si gechouft hat von Pu^erkcharten dem Lo^echler, di zu den zeiten di hernach benanten holden dienent: Chunrat der Peltz von ainem gu^et auf dem aigen gelegen in Hurrber pharr zwelf schilling, Ott ze Puesemdorf in Menkcher pharr sechs schilling, Ulreich der Schu^ester und Symon der Weber paid sibenzig phenning, U^elreich in dem Panpach achtzehen phenning .... zehen phenning . . . .³, auf dem Sultzhof zwen und dreizzig phenning, Hainreich der Chienpaum datz Lu^egperg fu^emfzig phenning; und achtzehn schilling und drei phenning geltes, di si von dem Guenrrspekchen gechouft hat, die zu den zeiten dienent Chunrat der Maghau^epp datz Hæting dreizehen schilling, in dem Chrewspach auf dem Toldenhof fumf schilling und drei phenning und drew phunt und sechzehen phenning geltes, di si gechouft hat von vrown Annen herrn Go^erigen tochter von Go^etzenstorf, die do ligent auf dem Frewdenperg^b auf zwain ho^efen darauf zu den zeiten Weigel und der Rennharter und Chunrat gesezzen sind; und ein halbs phunt geltes auf ainem lehen da zu den zeiten Hainreich an dem Weg auf gesezzen ist; und sibenthalben schilling geltes auch gelegen auf dem Petersperg auf behausten gu^et di si von dem O^ehu^etter⁴ gechouft hat; und sechsthalben schilling geltes gelegen datz den Schutzen; und acht jeuch holz gelegen pei dem Petersperg; und acht emmer weins geltes perkchrechts auf ainem weingarten gelegen ze Wesendorf in der Eben und haizzt daz Schu^etel, und alles das daz zu den vorgeschriben gu^etern geho^ert ze veld und ze dorf, es sei gestift oder ungestift, versu^echt oder unversu^echt, wie so das genant ist, mit allen den nu^etzen eren und rechten, alz di egenant vrowe Diemu^et von Landberkch^c diselben gueter alle in aigens gewer herpracht hat, also mit ausgenomener rede das diselben gueter alle pei dem egenanten gotzhaus ze Weinberch fu^erbas ewichleich beleiben schullen mi^er und allen meinen nachko^emen pharreren daselbs inne zehaben, ze niezzen und ze nu^etzen alz andrew gu^eeter di zu dem selben gotzhaus geho^ernt, unverchumert und ungeergert, an allen chrieg und an allen irrsal. Und darumb so han ich mit gu^etem willen mit wolbedachten mu^et mit gunst und nach rat der egenanten meiner chirhen lehenherren des erbern herren^d Ru^egers von Landberchb mich und all mein nachko^emen verlubt und verpunden und verpind auch uns mit dem bri^ef, daz wi^er fu^erbas alle zeit einen gesellen pei uns haben schullen, also daz ein pharrer allbeg selbander priester daselbs sein schol. Und schullen auch alle tag tegleich mit uns selber oder mit dem gesellen in dem egenanten gotzhaus ain mezz haben und verwesen an all verziechnu^ezz und saumung; der selb gesell schol alltag zu des pharrer tisch sitzen und schol im der pharrer di chost geben alz im selber alz zimleich und pilleich ist. Darzue schol er dem selben gesellen raihen und geben u^eber di chost all quatemmer sechs schilling wienna^er phenning. Auch schol der selb gesell haben swas von chindtauffen von peichtho^ern^e und von der heilichait ze raichen pilleich und rechtleich gevellet. Swaz aber von gescheftes wegen gevellet, des schol dem gesellen nu^er ain drittail volgen und di andern zwai drittail schullen^f dem pharrer gevallen. Es schol auch der gesell dem pharrer undertenig und gehorsam sein in allen wegen als pilleich und recht ist. Darzue schullen ich und all mein nachko^emen ewichleich der egenanten vrowen Demu^eten von Landberch und i^ern vordern einen jartag begên in dem obgenanten gotzhaus ze Weinberkch alle jar des nachsten phintzstages vor unsers hern auffart tag, also das wi^er desselben tag zu uns und dem gesellen drei priester haben schullen di an dem mitichen ze abent vigili mit uns singen mit newn letzen, und des morgens an dem phintztag schullen wi^er haben ain selampt und ain ambpt von dem tag und di andern drei priester schullen selmezz sprechen. Denselben drin priestern schol der pharrer desselben tags geben das mal und dar zu^e i^er igleichem und dem gesellen vier und zwainzig wienner phenning. Auch schullen ich und all mein nachko^emen in dem vorgenanten gotzhaus ein ewigs liecht haben und verwesen, das darinne tag und nacht an underlas prinne. Wenn aber das wêr das ein pharrer ze Weinberkch, wer der ze den zeiten wêr, an der egenanten mezze oder an dem jartag oder ewigem liecht saumig wêr und das alles nicht verweste und volfu^ert in der mazze so vorgeschriben stet, oder das er alle zeit einen gesellen pei im nicht hiet und dem das nicht widervarn liezz das vorgeschriben ist, als manigen tag er daz saumet als oft ist er vervallen ains phunt wachs ze pu^ezze, das di gemain dem gotzhaus da selbens ze pezzrung an legen schol. Und wo denn der pharrer der selben pu^ezz nicht richtet und ze lang verzug, so schol es di gemain da selbs oder wen si aus in darzue schaffent, pringen an den probst datz Sand Po^elten, wer zu den selben zeiten da probst ist, und als pald si es an in pringent so ist im der pharrer vervallen ains guldeinen phenning ze wandel, und schol denn der probst den selben pharrer mit geistleichem rechten dar zu^e halden und no^etten, so verre das er allev^g di pu^ezz di er verschuldet hat genzlich verricht und das er auch dar zu^e alles das volpring und erstatte das er an dem vorgeschriben gotzdi^enst und selgrêt, es sei an der mezz an dem jartag oder an dem liecht hat gesaumt. Und daru^eber zu einem warn offen u^erchu^end und zu ainer ewigen vestnung aller der vorgeschriben sache und handlung gib ich obgenanter Fridreich pharrer ze Weinberch fu^er mich und fu^er alle mein nachko^emen pharrer daselbens den bri^ef besigelten mit meinem angehangen^h insigel und mit des vorgenanten meines lehenherren insigel hern Ru^egers von Landberch, und han auch vleizzichleichⁱ gepeten den erbern herren maister Johannsen von Pergowechorherr ze Pazzowe und zu den zeiten des hochwi^erdigen fu^ersten meins genedigen herren pischof Albrechtes ze Pazzowe official und verwesêr in geistleichen sachen in O^esterreich,⁵ das er desselben amptes insigel ze ainer gezeugnu^ezz der sache an den bri^ef gehangen hat, und mit des erbern herren insigel herrn Marichartes von Ti^ernstain den ich des auch vleizzichleich^j gepeten han daz er der sache gezeug ist mit seinen angehangten^k insigel. Der brief ist geben ze Wienn, nach Christes gepu^erde dreuzehen hundert jar darnach in dem zwai und sibenzigistem jar, an sand Johanns abent ze sunnebenden.

Source Fulltext: LAMPEL, Urkunden Sanct Pölten (=FRA II, Wien 1901) S. 126-130