Ich Dietreich der Reykerstorffêr, ich Martha sein hausfrawe und all unser baider erben vergehen und tu^en chunt offenlich mit dem brief allen den di in sehent hörnt oder lesent, di nu lebent und hernach chu^enftig werdent, daz wi^er mit wolbedachtem mu^eet und mit gesampter hant und auch nach rat unserr nachsten und pesten freunt, zu^e der zeit da wi^er es mit recht wol getu^en machten, recht und redlich verchauft haben unsers rechten ledigen und freins aigens unsern gegentail aller der gu^eter und gu^elt, di wi^er gegen dem andern tail, den di erwirdigen geistlich hern her Leu^etold probst und der convent dacz Sandpo^elten, geleich an all auszu^eg gen uns gehabt habent und di gelegen sind in der Edlicz in Bischolfsteter pharr: von erst auf vi^er hofsteten behauster gu^eter gestifter holden zwen und neun schilling wienner phenning geltes, darnach den halbentail aines ganzen hofs daselbens in der Edlicz und darzu allez daz pawe waid wismad holz und waz dar zü gehört‚ und daselbens auf ainem akcher sibenthalben wienner phenning gelts. Den vorgenanten unsern tail aller der gu^eter und gu^elt mit allen den ern nu^eczen und rechten als wir di unversprochenlich in aigens gewer inngehabt und herpracht haben, es sei gestift oder ungestift‚ versu^echt oder unversu^echt, ze veld und ze dorf‚ wie daz genant ist und wo daz gelegen ist‚ haben wir verchauft und geben an all erbvogtei umb siben und zwainzig phunt wienner phennig, der wir genzlich verricht und gewert sein, den obgenanten geistlichen herren hern Lewtolden probst und dem convent dacz Sandpo^elten und allen iren nachko^emen fu^erbas ledichlich und freilich ze haben und allen irn frum damit schaffen verchaufen verseczen und geben wem si wellent an allen chrieg und irsal. Und sein wir des ir recht gewern und scherm fu^er all ansprach als aigens und des landes recht ist in Osterreich; get in^a fu^erbaz daran^b icht ab mit recht oder ob si mit recht icht chrieg oder ansprach daran gewunnen von wem daz wër, daz süllen wir in gënzlich gelten^c abtragen und auch widerchern an allen iren schaden und su^ellen si daz haben dacz uns unverschaidenlich und auf all dem gu^et daz wir haben oder noch gewinnen in dem lande ze Osterreich oder wo wir daz haben wi^er sein lebentig oder tod. Und des ze urchund gi^eb ich obgenanter Dietreich der Rey^ekerstorffer für mich und all mein erben den brief versigelten mit meinem insigel; und der sach sind gezeug die erbern herren her Marchart von Tyrnstain, her Weykchart von Toppel zdem Hausimpach mit irn insiglen; und des auch zeug ist Niclas der Akcho^eter mit seinem insigl, di wir darumb vlizziglich gepeten haben, daz si den chauf bestetet habent mit irn insiglen; wan ich obgenante frawe Martha selb aigens insigels nicht enhan, darumb so verpind ich mich under di gegenwurtigen insigl mit meinem trewen allez daz genzlich stet ze haben und ze volfürn daz vorgeschriben stet. Geben nach Christi gepürd tau^esent drew hundert jar darnach in dem drew und sibenzkisten jare, des sampztags vor dem palmtag.

Source Fulltext: LAMPEL, Urkunden Sanct Pölten (=FRA II, Wien 1901) S. 142-143