In Christi nomine; amen. Presentis instrumenti publici tenore cunctis pateat evidenter, quod anno a nativitate domini millesimo tricentesimo septuagesimo sexto, die XIIII^a mensis maii, hora quasi vesperorum, indiccione XIIII^a, pontificatus sanctissimi in Christo patris et domini nostri domini Gregorii digna dei providencia pape XI^mi anno sexto, in mei notarii publici testiumque subscriptorum ad hoc specialiter vocatorum et rogatorum presencia personaliter constituti religiosus vir dominus Johannes de^a Veltchirchen professus monasterii sancti Yppoliti canonicorum regularium ordinis sancti Augustini Pataviensis diocesis, procurator seu sindicus religiosorum virorum n prepositi et conventus monasterii sancti Yppoliti supradicti et procuratorio nomine eorundem ex una‚ et honorabilis vir dominus Leutoldus de Ror rector parrochialis ecclesie sancti Martini in Brukka dicte diocesis parte ex altera, qui quidem partes iam dicti venerabili in Christo patri ac domino domino Johanni preposito ecclesie collegiate sancti Stephani alias omnium sanctorum Wienne dicte diocesis et honorabili viro magistro Johanni Chottner canonico Augustensi tamquam veris arbitris arbitratoribus et amicabilibus^b compositoribus unanimiter et concorditer precibus instantivis supplicarunt, quatinus virtute compromissi in eos ab ipsis partibus alias debite facti pronuncciarent, dictarent et arbitrarentur^c. Qui quidem domini, videlicet dominus n prepositus et magister Johannes supradicti, quandam cedulam papiream tenorem qui sequitur continentem animo arbitrandi ipso domino n preposito pronuncciante atque legente produxerunt. Cuius quidem cedule tenor per omnia erat talis: — In nomine patris et filii et spiritus sancti; amen. Nos Johannes dei gracia prepositus ecclesie omnium sanctorum alias sancti Stephani Wienne Pataviensis diocesis, et magister Johannes Chottner^d canonicus Augustensis, arbitri arbitratores seu amicabiles conpositores communiter et concorditer a venerabilibus viris dominis preposito totoque^e capitulo monasterii sancti Yppoliti canonicorum regularium ordinis sancti Augustini ex parte una, et a honorabili viro domino Leutoldo rectore ecclesie parrochialis in Brukka ex parte altera, super iniuriis dampnis violenciis et controversiis quibuscunque, et specialiter in causa et questione ecclesie parrochialis in Brukka predictis ac quibusdam decimis quas idem rector in Brukka vendicabat, asserens ipsas decimas ad suam ecclesiam in Brukka pertinere, et super nonnullis expensis hincinde ab utrisque partibus factis canonice assumpti, auditis^f peticionibus utriusque partis et diligenter consideratis racionibus et allegacionibus quas dicte partes coram nobis producere et proponere volebant, et utriusque partis investigata et cognita voluntate, sollempnique per nos deliberacione prehabita, ex vigore dicti compromissi in nos facti et sub pena quam contra partem nostrum laudum et arbitrium non servantem duximus proferendam, cuius taxacionem nobis reservamus, dei nomine invocato, pro bono pacis et concordie inter dictas partes habende perpetuo, laudamus arbitramur pronuncciamus dicimus sentenciamus et mandamus predictum dominum n rectorem in Brukka desistere a citacione inquietacione et molestacione ac cedere et renuncciare omni accioni sibi contra dictos n prepositum et capitulum, et specialiter de et super decimis quas vendicabat nomine ecclesie sue, in quarum possessione et fructu sunt et fuerunt dicti n prepositus et capitulum sancti Yppoliti antedicti a tanto tempore, cuius contrarium memoria non existit. Ex adverso laudamus arbitramur pronuncciamus dicimus sentenciamus et mandamus dictos dominos prepositum et cappellanum ecclesie sancti Yppoliti desistere debere deinceps ab omni inquietacione molestacione ac infestacione ipsius n rectoris in Brukka ipsumque nominare tenere et habere ut verum in eadem ecclesia rectorem ac ipsum permittere libere percipere suos et ecclesie sue proventus et redditus, in quorum percepcione ipse est et sui predecessores fuerunt pacifice et quiete. Ac nichilominus dicimus et sentenciamus expensas quas utraque pars super dictis controversiis fecisse dinoscitur mutua compensacione^g tolli debere et presentibus sublatos esse volumus et pronuncciamus, nec una pars ab altera petere debet quovismodo; sed prepositus et singuli de capitulo debent generose ipsum n rectorem promovere dirigere tractare et defendere in agendis et graciam facere favorabilem et singularem quociens ab ipso rectore dicti n prepositus et capitulum fuerint requisiti in reconpensam expensarum. Volumus autem premissa omnia et singula hincinde fieri et a partibus predictis inviolabiliter adimpleri et servari sub pena quam^h nos parti contravenienti, ut dictum est, duximus imponendum, servata nobis nichilominus potestate moderandi declarandi interpretandi singula capitula supradicta quandocunque fuerit oportunum. — Latum et pronuncciatum fuit hoc laudum seu arbitrium Wienne antedicta in estuario minori domini prepositi ecclesie sancti Stephani antedicti, anno mense die hora indiccione et pontificatu quibus supra, presentibus honorabilibus viris dominis Ottone plebano ad Sanctam Petronellam, magistro Pilgerimo de Wuldestorf iure perito dicte Pataviensis diocesis ac pluribus aliis fidedignis testibus ad premissa vocatis pariter et rogatis. —||
Et ego Nicolaus olim Chunradi de Ysenaco clericus Maguntinensis diocesis, imperiali publicus auctoritate notarius, quia supplicacioni dictique arbitrii pronuncciacioni atque lecture necnon omnibus et singulis premissis dum sic agerenturⁱ et fierent, unacum prenominatis testibus presens interfui eaque sic fieri vidi et audivi, ideo de mandato dictorum dominorum n arbitrorum hoc presens publicum instrumentum manu mea propria conscribendo exinde confeci signoque meo solito et consueto una cum appensione sigillorum, videlicet dominorum arbitratorum^j predictorum signavi in testimonium premissorum.

Source Fulltext: LAMPEL, Urkunden Sanct Pölten (=FRA II, Wien 1901) S. 173-176