Ich Weikchart von Toppl ze Charlstetten und ich Gorg sein veter und all unser erben wir vergehen offenlich mit dem brief und tun chunt allen den die in sechent hörnt oder lesent, di nu lebent und hernach chunftig sind, das wir den zehent dacz Potnprunn mit alle die und darzü gehört ze veld und ze dorf, versuecht und unversuecht, chlainen und grossen, swie der genant ist, recht und redlichen verlihen haben als lehens recht ist in Österreich, Ulreichen dem Ledrer dacz Sand Pölten, frawn Annen seiner hausfrawn Ulreichs tochter von Wilhalmspurkch und allen iren erben sünnen und töchteren, den si gechauft habent von dem egenanten Ulreichen von Wilhalmspurkch seinem sweher umb zwainzig phunt wienner phenning, di si der^a genzlich verricht und gewert habent, also beschaidenleich das si mit dem vorbenanten zehent und mit alle die und darzü gehört alln iren frum schaffen sullen mit verseczen verchaufen und geben wem si wellen, wie inn das aller pest füeget und volkchumpt, mit unserm guetlichen willen, als lehen recht ist und gewonhait in Österreich. Mit urchund des briefs besigltn mit unseren^b zwain anhangunden insigln. Geben nach Kristi gepurde dreuzehenhundert jarr und in dem sibenundsibenzigistem jare, an suntag vor dem vaschang tag.

Source Fulltext: LAMPEL, Urkunden Sanct Pölten (=FRA II, Wien 1901) S. 187-188