Ich Ulreich Weidner zu den zeiten purgermaister ze Prukk an der Leyta und alle mein erben wir verjehen und tun kunt offenlich an dem brief allen leuten gegenburtigen und kunftigen, das wir uns recht und redleich verzign haben und auch verzeihen ains hofs, der do gelegen ist ze Prukk an der Leytta ze nost^a Sand Merten pharr und den wir ze lechen haben gehabt von den erwirdigen herren n dem chorherrn von Sannd Polten, also genomenlich das wir hinz dem vorgeschriben hof chain vordrung noch wortung nïmmer tün noch haben sullen in chainerlai sach noch weg an alle auszüg. Mit urchund des briefs versiglt mit der erbern purger chlain stat insigel ze Prukk an der Leytta, di der sach zeug sind mit irem anhangunden insigl in an schaden, dorunder wir uns verpinten alles das stet ze haben das vorgeschriben stet, wann ich obgenanter Ulreich Weidner nicht aigens insigel hab. Der brief ist geben noch Christi gepurd dreuzehenhundert jarr dor noch in dem siben und sibenzkistem jarr, an sand Urbans tag.

Source Fulltext: LAMPEL, Urkunden Sanct Pölten (=FRA II, Wien 1901) S. 192-193