Wir Lewtold von gotes gnaden probst dacz Sandpölten bechennen offenlich mit dem brief, daz für uns chomen sind der erber herr her Peter zü den zeiten pharrêr ze Hürben und der erber man Chünrat der Reschenriedêr von aines drittails des chraüt zehentes wegen ze Gru^eb in sand Margreten pharr gelegen‚ darumb si gen einander stözzig und ansprêchig gewesen sind, daz si des auf baiden tailen willichlich hinder uns und den erbern vesten ritter hern Hansen den Khienberger gegangen sind, waz wir zwischen in darumb erchanten und erfunden, da wolten si bei beleiben. Nu haben wir uns güter chuntschaft nach der erbern umbseczen rat erfarn daselbs und oüch den egenanten Chunrat den Reschenrieder ünderweiset, daz das egenant drittail zehentes zü der vorgenanten chïrhen gehöret und von alter dar zü gehört hat und hat^a sich des genzlich vor uns geauzzent und ledig gesagt der egenanten chirhen ze Hürben, daz der noch dabei beleiben sol. Aber durch sunderlicher dïnst und vleizziger gepet willen so hat der vorgenant her Peter dem egenanten Chunrat dem Reschenrieder daz egenant drittail zehentes erlaubt in ze nemen und ze vessen di nachsten sechs jar nach einander di sich anhebent an sand Gorgen tag der schirist chu^empt. Wenn abër daz ist das dieselbem^b sechs jar sich vergangen habent, so sol der obgenant zehent genzlich ledig sein und der vorgenanten chirchen wider gevallen an all irrung. Mit urchund des briefs besigelten mit unserm insigl. Geben an dem nachsten eritag vor sand Gorgen tag, anno domini millesimo CCC^moLXXVIII^o.

Source Fulltext: LAMPEL, Urkunden Sanct Pölten (=FRA II, Wien 1901) S. 206