Venerabilibus in Christo patribus et dominis dei gratia praeposito, decano totique capitulo et singulis canonicis ecclesiae Pataviensis nec non omnibus et universis aliis, ad quos vacante^a ipsa Pataviensi^b ecclesia in regularibus monasteriis aut locis electionum confirmatio spectare dignoscitur, Stephanus decanus totusque conventus monasterii sancti Ypoliti ordinis sancti Augustini canonicorum regularium Pataviensis diocesis se ipsos commendant^c cum omni subiectione et obedientia et orationibus tam debitis quam devotis. Sacris canonibus novimus esse statutum, ut ultra tres menses cathedrales aut regulares non vacent ecclesiae, ne lupus rapax ob defectum pastorum invadat gregem dominicum aut in suis facultatibus ecclesiae viduatae gravia dispendia patiantur. Eapropter bonae memoriae domino Leutholdo praeposito nostro de anno praesenti, die vicesima quarta mensis novembris, sicut domino placuit, ab hac luce subtracto, et corpore ipsius ut moris est cum reverentia qua decuit tradito ecclesiasticae sepulturae, ne nostrum monasterium diutius viduatum sua deploraret incommoda,^d nos Stephanus decanus et conventus praefatus, volentes eidem celeriter providere, terminum certum pro tractatu de electione facienda statuimus.^e Vocatis interim et tunc praesentibus omnibus qui ipsi electioni debuerunt, voluerunt et potuerunt commode interesse nobisque in refectorio nostro pro loco capitulari a nobis tamquam honesto electo et alias ad similia facienda consueto convenientibus, de electione novi praelati facienda tractavimus diligenter, et post diversos^f tractatus inter nos habitos et nominationes,^g diversas^h inquisitiones et discussiones personarum, placuit nobis omnibus et singulis per formam scrutinii nostro vacanti monasterio providere, scrutatoribus a nobis omnibus electis concorditer ac etiam deputatis.ⁱ Verum quia scrutinio publicato vota nostra fuerunt reperta divisa, aliis ex nobis concordantibus in religiosum virum Hartmannum dictum Veiertager concanonicum dicti nostri monasterii expresse professum in sacerdotio constitutum eumque^j tanquam maioribus numero eligentibus et intronizantibus per omnia iuxta morem, aliis autem resistentibus et sic fieri contradicentibus discordia inter nos permaxima tunc exorta. Tandem intervallo aliquorum dierum, cum negotium electionis praefatum inter nos nullatenus sopiretur ac sopiri facile speraretur, electus praefatus, considerans discordiam nihil boni parere et ex ea ipsi monasterio plurima dispendia, quorum causa ipse esse nolebat, verisimiliter evenire, ac communem utilitatem, eius instinctu qui dispersos unit et congregat, propriae anteferre, coram nobis omnibus et singulis ad hoc die sexta decima mensis decembris anni eiusdem, hora quasi nona vocatis et capitulariter congregatis libere et contradictione qualibet cessante electioni ipse cessit eamque et eius potestatem omnimode, quantum in eo erat et esse poterat, in manus et voluntates nostras voluntarie reposuit et etiam libere^k resignavit, supplicans ex affectu a nobis hoc non aegre ferri,^l si resignationem et cessionem gratanter acceptaremus ipsi monasterio utiliter provideri.^m Nos demum, cessione et resignatione praefatisⁿ tanquam nostro monasterio utilibus et pro praesenti tempore accomodis sincere et benevole acceptatis, precibus ipsius volentes annuere tanquam illi, ad quos ex tunc ordinatio et electio praelati iterum spectare noscebatur de iure, statim nullo alio actu medio interveniente secedentes in partem et vocationem de novo et tunc praesentibus omnibus qui voluerunt et potuerunt commode interesse, nobisque in refectorio nostro per omnia ut supra capitulariter congregatis de electione novi praelati tractavimus et post diversos^o tractatus discussiones et inquisitiones per nos habitas, tandem placuit nobis per viam compromissi nostro viduato monasterio providere, dedimusque tunc nos omnes et singuli nostrum omnimodam potestatem discretis et religiosis viris Perchtoldo dicto Küchel, Joanni dicto Tüers, Michaeli de Holnburga confratribus et canonicis nostris presbyteris nostri monasterii expresse professis tanquam ipsius monasterii senioribus et magis providis, ut iidem vel maior pars eorum vice sua et nostra pro electione canonica monasterio nostro praedicto vacanti, prout inter se deliberatione praehabita convenirent, de persona idonea providerent. Qui secedentes in partem, ut nobis postea retulerunt, — — sapientum communicato consilio et deliberatione inter se habita diligenti in religiosum virum Fridericum dictum Pockfues ipsius monasterii expresse professum, in sacerdotio constitutum, maturae aetatis, de parentibus honestis, virum providum in spiritualibus et temporalibus circumspectum, moribus vita scientia disciplina et regulari observantia merito commendandum iidem concorditer convenerunt. Quem etiam — — dominus Michael unus ex compromissariis praedictis iuxta instituta canonica, de voluntate et consensu unanimi aliorum compromissariorum in hunc modum elegit: In nomine Patris et Filii et Spiritus Sancti; anno et die quibus supra,^p hora quasi vesperorum: »Ego Michael de Holnburch compromissarius praedictus de voluntate et consensu concordi conpromissariorum^q et collegarum meorum, in quos compromissum fuit a capitulo nostro ut superius exprimitur, vice mea et ipsorum omnium ac aliorum ius in electione habentium hic praesentium et quorum subscriptiones inferius annotantur, et ex potestate praedicta mihi et collegis meis concessa, invocata Spiritus Sancti gracia, Fridericum dictum Pockfues in quem simul nos omnes compromissarii convenimus, in nostrum et monasterii nostri praepositum eligo et pastorem. Ipsam electionem coram vobis omnibus solempniter publico in communi« Quam electionem sic canonice celebratam et solempniter publicatam omnes in communi recepimus et approbavimus et etiam approbamus, electione ipsa praefato electo praesentata et consensu ipsius petito et per ipsum praestito, ‚Te Deum laudamus' solempniter decantando ipsumque electum nostrum in sedem consuetam inthronizavimus iuxta consuetudinem nostri monasterii usitatam et electionem ipsam clero et populo per confratrem nostrum Michaelem de Holnburch praefatum fecimus publicari capitulariter paternitatibus vestris et dominationibus voto unanimi supplicamus humiliter et devote, quatenus electionem eandem sic solempniter celebratam confirmare dignemini ac novum electum canonice investire, ut auctore domino ipse nobis velut pastor ydoneus et toti nostro monasterio præesse valeat et iudex nosque et alii ei commissi sub eius sancto regimine possimus coram deo salubriter militare. Ut autem nostri monasterii vota in omnibus et singulis supradictis concordasse et in hanc electionem et petitionem convenire noscantur,^r praesens electionis decretum vobis ipsi transmittimus iuxta statuta canonica roboratum propriis manibus et subscriptum, quoad maiorem cautellam per notarium publicum infrascriptum in publicam formam redactum et suo signo signatum, sigillo nostri conventus iussimus appensione muriri. Acta sunt anno domini millesimo CCC^mo octuagesimo, die horis loco quibus supra, indictione 3^tia, pontificatus sanctissimi in Christo patris ac domini nostri domini Urbani pape viti anno 3^tio, praesentibus honorabilibus et discretis viris dominis Johanne in Nalib, Jacobo in Mauttarn et Wichardo in Haindorff presbyteris parochialium ecclesiarum rectoribus praedictae Pataviensis diœcesis vocatis specialiter et rogatis in testimonium praemissorum. — — — — ¹ Stephanus decanus²||
Et ego Ulricus de Hainburga dictus Grim, clericus diocesis Pataviensis, publicus imperiali auctoritate notarius .... hoc electionis decretum signo solito et consueto signavi.³

Source Fulltext: LAMPEL, Urkunden Sanct Pölten (=FRA II, Wien 1901) S. 239-242