Ich Marchart von Tirenstain und all mein erben vergehen offenlich mit dem brief allen den die in sehent hornt oder lesent, di nu lebent und hernach kunftig sind, das wir mit wolbedachtem muet, zder zeit do wir es wolgetuen machten, recht und redlichen ausgewechselt und gegeben haben den erwirdigen geistlichen herrn herren Lewtolden probst ze Sand Polten herrn Stephan techant und dem convent daselbs und allen iren nachkomen unsers rechten aigens aindlef schilling und zwen wienner phenning gelts, die man jerlich dint von ainem gütt gelegen^a am Wintpühel in Wilhalmspurger pharr, da zden zeiten Walchün auf gesessen ist, und darzu acht phunt wienner phenning ze überteurung, die si dem egenanten irem goczhaus ze frum und ze nucz angelegt habent, umb ain vischwaid gelegen auf der Piela bei Renhartstorf, di da stozzet an die vischwaid di gen dem Wasen gehört und an die vischwaid die wir in gegeben haben und als si die gechauft habent von^b Ulreichen dem Pielaher und seinen erben mit aller zuegehorung versucht und unversücht, die ir freis aigen gewesen ist, also beschaidnlich das wir inn von derselben vischwaid jerlich an sand Michels tag vier wienner phenning ze purkrecht dienen und raihen süllen, und sullen si dan mit dem obgenanten güt am Wintpühel und waz darzü gehört ze velde und ze dorf, gestift und ungestift, versucht und unversücht, allen iren früm schaffen verkaufen verseczen und geben swem si wellent an allen krieg und irsall. Und sein wir des ir recht geweren und scherm fur all ansprach als aigens und des landes recht ist in Osterreich; get in aber daran icht ab mit recht, das süllen wir inn alles ausrichten und widerkeren, und süllen si das haben dacz uns und auf all dem güt das wir haben in dem lande ze Osterreich, wir sein lebentig oder tod. Und des ze urkund so gib ich in obgenanter Marchart von Tirenstain den brief besigelten mit meinem insigel für mich und all mein erben; und der sach sind gezeugen mein gut frewnt herr Wulfing und Mert von Planknstain mit iren insiglen, und ist geben an sand Cholmans tag, nach Christi gepurde drewzehenhundert und in dem achzigistem jare.

Source Fulltext: LAMPEL, Urkunden Sanct Pölten (=FRA II, Wien 1901) S. 237-238