Ich Thaman auf dem Parcz in der Altenstat zu^e Prukk an der Leytta und . . mein hausfro^ew und alle unser erben wi^er vergehen und tu^en ku^ent mit dem brief allen leuten gegenwu^ertigen und chu^enftigen, di^e den brief sehent oder ho^erent lesen, di^e nu^e lebent und hernoch chu^enftig sint, das wi^er unverschaidenleich gelten süllen dem erbern herren hern Lewtolten vom Ro^er zu^e den zeiten pharrer zu^e Prukk an der Leytta und ainem isleichen chu^enftigen pharrer do selbs zu^e Prukk vier phu^ent ungrischêr phenning, also mit ausgenomer red: di^e weil wi^er in di^e vorgnanten phenning nicht engeben, di^e weil sullen wi^er in alle jar dovon dienn ain halbs phunt ungrischer phenning an sand Cholmans tag; und welichs jars wi^er den di^enst verziechen, daz wi^er nicht dienn alz vo^er benant ist‚ so sol sich der selb di^enst zwispillen alz u^eberlendiges gu^etes recht ist und dez landes recht zu^e O^estereich. Und durich pezzer sicherhait willen so haben wi^er in fu^er hauptgu^et di^enst und zwispill ze rechtem phant gesaczt mit verdachtem mu^eet und mit gesampter hant und mit willen und gu^enst aller unser erben, ze der zeit do wi^er ez wol getu^en mo^echten und mit Michels Braitter hant di^e zeit hern Pu^erchartes von Winden amptman, unsern halben ho^ef gelegen in der Altenstat zu^e Pru^ekk an der Leytta zu^enost dez Heribstmaister hof ainhalb und ze nost Jannseins Smid ho^ef anderhalb, do man alle jar von di^ent zwen und sechzig wienner phenning zu^e pu^erchrecht und nicht mêr. Und wann daz ist daz wi^er den obgenanten di^enst ab wellen oder mu^egen gelo^esen, den sullen wi^er an dhaim tag im jar mêr ablo^esen denn an sand Cholmans tag mit vier phu^enten ungrischer phenning und mit dem di^enst der ze dem selben tag dovon gevellet als vo^er benant ist. Wer aber daz wi^er den obgenanten di^enst nicht ablo^esten alz lang daz sein den obgnanten hern Lewtolten pharrer zu^e Prukk an der Leytta oder sein nochcho^emen phorrer do selbs zu^e Prukk verdru^ezze, wann sew dann der vorgnanten phenning nicht lenger geraten mu^egen oder wellen und di^e an uns vo^erdernt, so sulle wi^er sew weren an alle widerred und an allen chrieg. Tu^en wi^er dez nicht, so ist daz unser gu^etleich willen daz sew den vorgnanten hof i^er phant an recht und an vrog und an alle chlag verseczen und vercho^eufen und geben wem sew wellen alz lang daz sew hauptgu^etes di^enstes und zwispils gar und ganz verricht und gewert werden an alle i^er scheden, daz lob wi^er in ze laisten mit unsern trewn an gêvêr; und waz in hauptgu^etes di^enstes oder zwispils an dem vorgnanten phant abgêt daz sullen sew unverschaidenleich haben auf uns und auf alle dein gu^et daz wi^er haben in O^estereich und in Ungern oder wo wi^er ez haben oder hinder uns lazzen, ez sei eribgu^et oder varundgu^et^a‚ wi^er sein lebentig oder to^ed. Und doru^eber so geben wi^er in den brief ze ainem waren u^erchu^ent der sach versigilten mit der erbern pu^erger chlainn stat insigil zu^e Prukk an der Leytta,² di^e der sach zeugen sind mit i^erem anhangu^endem insigil in an schaden, doru^ender wi^er uns verpinten allez daz stet zu^e haben daz an dem brief geschriben stêt, wann ich obgnanter Thoman nicht aigens insigil hab. Der brief ist geben noch Christi gepu^erd dreuzehenhundert jar dornach in dem achtzkistem jar, an sand Veycz obund.

Source Fulltext: LAMPEL, Urkunden Sanct Pölten (=FRA II, Wien 1901) S. 236-237