In nomine domini; amen. Venerabilibus in Christo patribus et dominis suis, domino Hermanno electo et decano, totique capitulo ecclesiae Pataviensis, ipsa ecclesia Pataviense ad presens vacante¹ dominis et patribus suis gratiosis, Stephanus decanus, Michael de Holenbürch, Ulricus de Wienn, Hainricus Zintzendorfer, Hartmannus Veyrtager, Ulricus Oeder, Chunradus de Wienna, Gerungus Püschinger, magister Johannes, Andreas de Welmikh, Wolfgangus Fawchter, Michael de Chasten, Joannes Wienner, Eberhardus de Tullna, Wolfhardus de Wienna, Petrus de Tullna, Nycolaus Metzendorfer, Stephanus granator, canonici regulares ordinis sancti Augustini monasterii Sancti Ypoliti Pataviensis diocesis, orationes in Christo devotas cum obedientia tam debita quam condigna.¹ Cum propter vocationem diutinam ecclesiae pastoris solatio destitutae gravia in spiritualibus et temporalibus dispendia patiantur, conditores canonum provida deliberatione statuerunt, quod altra tres menses vacare non debent ecclesiae regulares. Ea propter bonae memoriae domino Friderico quondam praeposito monasterii nostri hoc anno, die penultima mensis Augusti, sicat domino placuit‚ viam universae carnis ingresso eiusque corpore ipso die, prout decuit, per nos ecclesiasticae tradito sepulturae, ne ipsum monasterium nostrum viduitatis incommoda diutius deploraret, fuit a nobis omnibus die ultima mensis eiusdem Augusti concorditer assignatus terminus in refectorio monasterii nostri, loco ad hoc solito et consueto,² de electione futuri nostri pastoris tractanda, Ipsa itaque die ultima mensis Augusti antedicti vocatis omnibus qui debuerunt, potuerunt et consueverunt interesse, et presentibus nobis omnibus termino in praedicto uno solo videlicet Hartmanno Veyrtager excepto, ante horam tertiam illius diei et missa Sancti Spiritus in altari Sancti Ypoliti solenniter decantata, nobis omnibus et singulis in praefato refectorio loco ad hoc, ut praemittitur, apto et congruo et consueto, capitulariter congregatis, praesentibus testibus infra scriptis (uno solo videlicet Hartmanno Veyrtager tunc con canonico nostro absente, quem per unum de fratribus et canonicis nostris, videlicet Wolfgangum Fevvchter et duos testes, ac notarium publicum scilicet Weykhardum de Viechtach vocavimus, ut hora vesperorum ipso die ad refectorium nostrum venire non differret, quo veniente hora vesperorum antedicta et sic nobis omnibus et singulis in saepe dicti loco in unum capitulariter congregatis, ut saepe praemissum est) diligenti deliberatione praehabita, placuit nobis omnibus et singulis ad electionem futuri praepositi per formam mixtam decretalis ,Cum dilecti' aprobatae per decretalem Bonifacii VIII. ‚Cum expediat'³ in duos de capitulo nostro videlicet Stephanum decanum et custodem monasterii nostri et magistrum Joannem plebanum nostrum in S. Ypolito, concanonicos nostros compromisimus, ut ipsi secreto et sigillatim scrutatis suis et singulorum votis illum eligerent in praepositum monasterii nostri et nostrum, in quem omnes vel maior pars et sanior totius nostri capituli consentirent. Ipsi vero potestatem sibi traditam acceptantes ad partem se trahentes primo sua et deinde singulorum nostrorum vota secrete et sigillatim scrutati fuerunt, eaque in scripta redacta mox publicarunt in communi: quibus publicatis et tandem habita collatione numeri ad numerum, zeli ad zelum, meriti ad meritum, nullo alio actu interveniente quam, ut firmiter credimus, spiritus sanctus gratia inspirante, nos omnes et singuli praedicti (quorum omnium subscriptiones inferius continentur) direximus vota nostra nullo discrepante, in religiosum virum Gerungum Püschinger infirmarium nostrum, virum utique providum et discretum, vita et moribus merito commendandum in sacerdotio et aetate legitima constitutum, de legitimo matrimonio genitum, in spiritualibus et temporalibus plurimum circumspectum, confratrem et con-canonicum nostrum et ordinem canonicorum regularium sancti Augustini expresse professum, literarum scientia competenter eruditum, quem etiam venerabilis et religiosus vir dominus Stephanus decanus et custos monasterii nostri antedicti, unus de conpromissariis praedictis, auctoritate per nos sibi tradita, de expressa sui con-promissarii voluntate et assensu, nobis presentibus omnibus in praepositum nostrum et nostri monasterii elegit per verbum singularis numeri et inscriptis per omnia in haec verba: Ego Stephanus decanus et canonicus professus monasterii Sancti Ypoliti nomine meo et collegae mei ac totius capituli monasterii antedicti, eligo dominum Gerungum dictum Puschinger canonicum expresse professum praelibati monasterii in praepositum et praelatum monasterii nostri saepe dicti in nomine Patris et Filii et Spiritus sancti. Quam electionem omnes acceptavimus, gratamque habuimus et acceptam, ipsamque electo nostro praesentavimus, sibique instantius supplicavimus, ut propter deum et animae suae salutem benignum accomodare dignetur assensum‚ qui licet ab initio reniteretur, nolens tamen divinae resistere voluntati, votis nostris timide ac devote annuit electioni consentiens de se factae, quo consensu a nobis laetanter gratanterque recepto, ipsum in chorum sub stola deduximus ‚Te deum laudamus’, altis vocibus decantantes et pulsatis campanis electionem ipsam per dominum Michaelem de Holenbürg⁴ con-canonicum nostrum clero et populo fecimus sollemniter publicari. Qua propter⁵ capitulariter paternitatibus vestris et dominationibus voto unanimi supplicamus humiliter et devote, quatenus electionem eandem sic solempniter celebratam confirmare dignemini ac novum electum canonice investire, ut auctore domino ipse nobis velut pastor ydoneus et toti nostro monasterio praeesse valeat et iudex, nosque et alii ei commissi sub eius sancto regimine possimus coram dei salubriter militare. Ut autem nostri monasterii vota in omnibus et singulis supra dictis concordasse et in hanc electionem et petitionem convenire noscatur praesens electionis decretum vobis ipsi transmittimus iuxta statuta canonica roboratam propriis manibus et subscriptum quoad maiorem cautellam per notarium publicum infra scriptum in publicam formam redactum et suo signo signatum sigillo nostri conventus iussimus appensione muniri. Acta sunt haec in monasterio nostro praefato, die predicta ultima mensis augusti saepe dicti, anno nativitatis domini millesimo trecentesimo ottuagesimo^a ottavo^a, indictione XI pontificatus sanctissimi in Christi patris et domini Urbani divina providentia papae VI. anno XI., praesentibus honorabilibus et discretis viris dominis Leonhardo dicto Schawr, Ratisponensis et Pataviensis ecclesiarum canonico, licentiato in decretis ac officiali curiae Pataviensis, Curado Potenprunner, Stephano Fawchter in Weiderveld ac in Pehemchirchen ecclesiarum parochialium rectoribus, Johanne de Sancto Floriano presbyteris Pataviensis diocesis‚ testibus ad praemissa vocati specialiter et rogatis.||
Et ego Stephanus decanus professus monasterii Sancti Ypoliti unus de conpromissariis praedictus praedictis interfui et praedictae electioni consensi et consentio et manu propria me huic decreti subscripsi. ||
- - - - - - - - - - - - - - - - - - - - - - - - - - - - - - - - -⁶||
Et ego Weykhardus de Viechtach clericus Ratisponensis diocesis, publicus imperiali auctoritate notarius etc.

Source Fulltext: LAMPEL, Urkunden Sanct Pölten (=FRA II, Wien 1901) S. 304-307