No. 124. 1408. 10. Juli.

Wir die ratismeister vnde rad der stad Gotha bekennen vnde thun kunth mit disseme briefe also. Als er Johans Melczer selige vnde Gotschalk Leichberg vnde ir erbin ynne gehad habin vnde noch haben eynen brieff der stad von Lipczig, der da heldit sechs vnde drißig marg lotiges silbirs Erffurtischs zceichins, daruff sie en alle iar dry marg czu czinse gegebin habin, der selbe brieff vorleyt ist, das sie en nicht fynden können, nu habin die ersamen wiesen lute burgermeister vnd radlute czft Lipczig des obgenanten ern Johans Melczeris muter das halbe teil abe gelost vnde habin ir dar vor gegebin achczehen lotige marg silbers Erffurtischs zceichins mit deine czinse, vnde sagen die burgermeister radlute vnde die gancze stad der achczehn marg mit denje czinse quiid ledig vnde los von des obgnanten ern Johans Melczers muter wegin vnd alle irer erbin wegin. Wer ouch ab der brieff wedir funden wurde, so redin vnde gelobin wir vor des vorgenanten ern Johans muter vnde alle ir erbin, das sie des houbtgeldis vnde czinses vnde was daruff gegeben mochte nummer gefordern sullen ane argelist, vnde das der stad Lipczig brieff, der dor ubir gegebin ist, von der cziid, das dessir brieff dar ubir ist gegebin, quiid ledig vnde loß vnde tod syn sal, nummermer houbitgeilt adir czinse da mete czu fordern adir czu inanen; dor vor wir obgenanten ratismeister vnde rad czu Gotha redin vnde gelobin, sie des gutlichin abe czu nemen ane yren schadin an argelist. Des czu orkunde habin wir vnsir stad Gotha ingesigil an dessin brieff gehangen, der gegebin ist nach Cristi geburte vierczenhundirt iar dar nach in deme achten jare am dinstage noch sendte Kilians tage des heiligen bischoffes vnde merterers.

Nach dem Orig. im Rathsarchiv zu Leipzig mit dem Siegel der Stadt Gotha an einem Pergamentstreifen.

79