No. 212. 1442. 29. Apr.

Wir Friderich vnd Wilhelm gebrudere von gotes gnaden herczogen zcu Sachssen — bekennen —, als die ersamen wiesen burgermeister ratmanne vnd gancze gemeyne vnser stad Lipczk vnser lieben getruwen dem gestrengen ern

163

Wedekindt vom Lohe ritter vnserm rathe vnd lieben getruwen vnd sinen erbin hun- dirt vnd viervndczwenczig Rinische gülden gut am golde vnd swer gnug an gewichte ierlichs czinses halb vf sente Jacofs vnd halb vf vnser lieben frauwen tag licht- wihunge ierlichin zcu beczalen an vnser stad Lipczk für sechczehn hundirt vnd czwelf Rinische gülden der gnanten were vf eynen widerkauf als selbschuldigen verkauft haben, das sie das von vnseres geheißes wegen gethan vnd wir sollich sechczehn- hundirt vnd czwelf gülden von dem gnanten ern Wedekind selber genomen vnd die an vnser herschaft nucz vnd fromen gekart vnd gewant haben, vnd heissen die gnanten vnser burgermeister ratmanne vnd gancze gemeine zcu Lipczk solche hun dirt vnd viervndczwenczig Rinischer gülden ierlichs czinses dem obgenanten ern Wedekind sinen erbin ader wer den kaufbrief mit irem guten wissen vnd willen innehadt von vnser stad Lipczk iarrenten, die wir bie yn vff Walpurgis vnd Michaelis haben, ierlichen vf die obgerurten czwo tagecziite zcu reichen vnd zcu geben, die wile wir sollich sechczehnhundirt vnd czwelf gülden dem egenanten ern Wedekind sinen erbin ader innheldern des kaufbriues nicht wider abgekauft vnd beczalt habin. Vnd wanne vnd als oft die gnanten burgermeister radmanne vnd ganczgemeine zcu Lipczk die obgeschriben hundirt viervndczwenczig gülden ierlichs czinses von vnsern iarrenten als obingemelt ist gereicht vnd beczalt haben, reichen vnd beczalen werden, also ofte sagen wir sie der quiid ledig vnd loß, vnd wir gereden mit vnd incrafft dißes briues vor vns vnd vnser erbin in guten truwen, das wir vnser burgermeister ratmanne vnd ganczgemeyne vnser stad Lipczk vnd alle ir nachkomen der sechczehnhundirt vnd czwelf gülden heubtgeldes vnd der hun dirt viervndczwenczig gülden ierlichs czinses nach vßwisunge aller punct vnd artickele des kaufbriues, den sie darüber von vnsers geheiß wegen dem oftgnanten ern Wedekind gegebin haben, ane allen iren schaden gütlich benemen, entledigen vnd sie der vertreten wollen ane allis geuerde. Zcu bekenteniße habin wir vnser beider ingesigel an diessen brief wissentlichin lassen hengen, der gegebin ist zcu Wissenuels nach gotes geborte vierczenhundirt vnd darnach in dem czweyvndvier- czigsten iare am sontage Cantate.

Nach dem Orig. im Eathsarchiv zu Leipzig mit den Siegeln des Kurfürsten und des Herzogs an Per gamentstreifen.