No. 427. 1469. 25. Mai.

Wir Friderich von gottes gnaden Romischer keyser zuallenczeitten merer des reichs, zu Hungern Dalmacien Croacien je. kunig, herczog zu Osterreich vnd zu Steyr ic. entbieten den ersamen vnsern vnd des reichs lieben getrewen burgermeister vnd ratt der statt zu Halle in Sachssen vnser gnad vnd alles gut. Ersamen lieben

355

getrewen. Nach dem in der gemelten statt Halle auff den newen iars tag vnd acht tag darnach von alter ein iarmarckt gehalten vnd gepraucht worden ist vnd aber auß ettlichem furnemen, auch in crafft ettlicher vnser keyserlichen brief, so doch von vns auff anbringen vnd mit versweigung solicher alten herbrachten gerechtikeitt des gemelten ewers iarmarckts erlangt vnd außgegangen sein sollen, der selb ewer iar marckt abczutreiben vnd zu swechen vnd ein ander new iarmarckt zu Lipczk zu haben furgenomen wirdet, vnd aber euch von dem gemelten ewerm alten herbrachten iarmarckt vnd gerechtikeitten zu dringen vnd den selben zu schaden vnd abczutrei ben ander auffrichten zulassen vnser meynung vnd will nye gewesen vnd noch nit ist, darumb so haben wir solich furnemen des gemelten newen iarmarcktz zu Lipczk furgenomen widerrufft vnd abgestellt nach innhalt vnser keyserlichen brief darüber außgegangen. Vmb das dann vnser vnd des heiligen reichs statt Halle bey dem egemelten irem alten herbrachten iarmarckt dester bas bleiben mug vnd daran nit verhindert noch beswert werde, so empfelhen wir euch von Romischer keyserlicher macht bey den pflichten, damit ir vns vnd dem heiligen reich gewandt seyt vnd darczu einer pene nemlich hundert marck lottigs goldes vns in vnser keyserlich camef vnableslich zu beczaln ernstlich vnd vesticlich mit disem brief gepiettend, das ir den obgemelten iarmarckt zu Halle hinfur als von alter herkomen ist vesticlich halten hanthaben schuczen vnd scliermen vnd euch vnser vorberurt keyserlich brief noch ander furnemen vnd handlung, so dawider beschehen wer oder werden mocht, gar nichtz irren noch verhindern lassen, als ir vns dem heiligen reiche vnd euch selb solichs schuldig vnd pflichtig seyt. Daran tut ir vnser ernstlich maynung vnd gut geuallen. Geben zu Grecz am funffundczwenczigisten tag des monads May nach Cristi gepurt vierczehenhundert vnd im neunundsechczigisten, vnser reiche des Romi schen im dreissigisten, des keyserthumbs im achtzehenden vnd des Hungerischen im eindlifften iarenn.

Nach dem Orig. auf Papier im Rathsarcliiv zu Leipzig. Das auf der Rückseite aufgedrückt gewesene kaiserliche Siegel in ruthem Wachs ist abgefallen.

Der Text des kaiserlichen Schreibens, welchen v. Dreyhaupt Beschreibung d. Saalkreises II. S. 445 nach einem Transsumt des Frohstes vom Kloster Neuwerk v. 23. Aug. 14t>9 mittheilt, weicht von der an den Rath zu Leipzig gelangten Ausfertigung mehrfach ab.