Wir burgere, ratlute vnde gesworn der stad czum Hoin obir Elbin, vnde di gancze gemeyne dy iczczunt sint vnde noch vns werdin, Hencze Kelle burgermeister, Nicolaus Cerremantel, Hans Leczan, Niczsche Konyngisprucke, Petir Gunczel, Bern

230

hard Strele, Hans Steinweg, Nickel Voyd, Hans Herenbecker, Niczsche Borschewicz, Niczsche Kolbe, Siffridus bekennen vnde tun kund in disim offin briefe allin den, di in sehin, horen odir lesin, daz wir von geheisis vnde gebates wegen dez hochgeborn fursten, ern Wilhelms margrafen czu Misin, vnsers libin gnedigen heren, vnde ouch myt wissin vnde gutem willin vnser libin gnedigen vrowin, vrowin Elizabeth, mar- grafinnen czu Misin, vnde von irm geheise glabin vnd glabit habin in guten truwin myd kraft dises keinwertigen brifes dem erbern ern Gerlache von der Widere, vnde ouch allen synen nochkomen achczen schok grosschin Vribergisschir muncze czu eyner ewigen vicaryen vnde altare in dem tume czu Misin, di der egnante vnser libir gnediger here er Wilhelm margrafe czu Misin von nuwens vsgesaczt vnde stift hod, vnde gewyet ist in der ere sende Gurgin, sende Mauricii, sende Gangolfe der heiligen merterere, sende Philippi vnde Jacobi der heiligen aposteln vnde der heiligeu iuncfrowin sende Dorothee, vnde glabin yn di obgenanten achczehin schok grosschin, halb vf sende Walpurgen tag vnde halb vf sende Michels tag, dy nehst czu kumftig werdin gutlich beczalin vnde czu reichin ane alles arg vnde ane allirleye vfschup. Ouch glabe wir dem egenanten ern Gerlache vnde allen sinen nochkommen, daz wir sullen noch enwollen keynerleye infall von vnser stad wegen intragen von keyner- hande sachin wegen, sundern wir wollin di vorbeschrebin achczen schok grosschen gutlichin ane allis arg leisten vnde beczalen, vf di vorgnanten czwene cinstage alle iar ierlich vnde ewiglichen von vnsers heren stat iarrente ane arg vnde vnuorczegen- lichin. Daz wir alle dise vorgnante globde vnde beczalunge vnde stucke stete vnde gancz halden wollin vnde sullin ane allis arg, dez czu eynem merklichin bekentnys vnde vestnysse habe wir vnser stad groste ingesigel an disim brief lazin hengen, der gegebin ist noch Cristi geburt driczhenhundirt iar in dem sebin vnde achczigisten iare vor vnser vrowin tage lichtewyen purificationis an dem mantage.

Nach dem Orig. im Stiftsarchiv zu Meissen mit dem grossen Siegel der Stadt an einem Pergamentstreifen.