Wir Johannes von gotis gnadin Bisschof zcu Mizsen bekennen vffenlichen vnde tun kunt mit disem brife allen den die yn sehen horen adir lesen, daz wir mit guten willen vnde wolbedachten mute dem hochgebornen fursten vnde herren ern Wilhelm marggrauen zcu Mizsen lantgrauen in Duringen vnde phalczgrauen zcu Sachsen vnserm liebin herren in guten truwen ane allis geuerde vns vorbunden vnde globet habin, daz wir ym, synem furstentum vnde herschaft bystendig beholfen vnde getruwelichin dynen sullen vnde wullen mit dem stifte zcu Mizsen, vnde mit alle syner zcugehorunge vnde mit allen des stiftes zcu Mizsen slozsen landen vnde luten mit ganczer vnser macht zcu allen synen noten vnde gescheffeden, wenne vnde wy dicke er des ymmer bedarf wider allir menlichen nymandis vzgenomen. Daz globin wir ane allirleye argelist widersprache hulferede vnde ane allis geuerde. Ouch globin wir in sulchem vorbunt- nizse, daz wir vnser bischtum zcu Mizsen in keynerleye wiis lazzen vflazsen vor- wechseln an nymandis brengen nach keyns darmite tun sullen nach enwullen, wir tun is denne mit des obgenanten vnsirs herren willen wizsen vnde rate. Daz globin wir vnde habin daz mit gutem willen liiplich zcu den heiligen gesworn stete veste vnde gancz zcuhaldene ane allirleye intrag argelist vnde ane allis geuerde, vnde habin des zcu orkunde vnde merer sicherheit vnser insigel an disen bryf lazzen hengen. Hirby syn gewest vnde sint geczuge die erwirdigen er Nyclaus bisschof czu Cathosien vnser bichtiger, er Johannes techand zcu Mizsen vnser canceler, die gestrengen er Offe von Slewyn vnser hofemeister, er Hugolt von Slynicz vnde Nyclaus vom Honsberge. Ge- gebin zcu Dresden nach gotis geburt dryczenhundirt iar in dem dry vnde nunczigsten iare an dem nesten dinstage nach deme suntage als man singet Reminiscere.

Nach dem Original im Ernestin. Gesammt-Archiv zu Weimar mit dem wohlerhaltenen Siegel des Bischofs an einem Pergamentstreifen.