An dem sunnabunde vor Simonis et Jude hab wir mit unsern eldistin ubireyne getragin, daz welch man hoppfin hi hat, her sy burger adir gast, der sal en dirlezin vnd reyne machin by 14 tagin vnd wer vorbas me hoppfin her brengit, der sal reyne vnd lwtir syn; were abir, das her bleterig adir ramig were, so sal man en reyne machin by acht tagin. Dorzu hab wir vir manne gekorn, di das bezehin sullen, vnd ab si nicht gar dorczu komen mochtin, so sullen ir io czwene dorzu zehin vnd man sal vorbas keynen hoppfin vorkeufin noch der hoppfener messin; di vir manne adir io irre czwene haben en denne vor bezehin. Nu hab wir gekorn Mathis Proczkinhayn, Niclos Kindilwirt, Fren- czil Willusch vnd Jacob Hefteler.

2. Ouch hab wir mit vnsern eldistin ubireyne getragin, das welch gast vorbas me hoppfin her brengit vnd den nicht reyne machin welde, alz vorge- schrebin stet, vnd en voreuelich wek furte, der sal keynen hoppfin vorbasme her brengin czu vorkeufin, vnd wer dise gezecze nicht enhilde von deme wel wir besserunge nemen nach deme, alz vns vnser eldistin vndirwyzen.