Ich Engelhart Herr zü Winsperg, lantvogt miner gnedigen Her schaft von österrich Bekenn vnd tun kunt mit disem brief, alz Hans von Bühel miner Herschaft von österrich die lehen uf geben hät, alz er denn die von iren genaden zü lehen het vnd ouch bat mine gnedigen Heren hertzog luvolt, hertzog zü österrich etc. die selben lehen wider ze lihen sinem sün Cuntzen von Bühel, also enpfalch mir min Herschaft von österlich die selben lehen wider zü lihen dem vorgeschriben Cuntzen von Bühel, vnd also Hab ich obgenanter her Engel hart die selben lehen gelühen Cuntzen von Bühel, Hansen von Bühelz sun in namen vnd an statt miner Herschaft von Osterrich alz ir lantvogt, dez ersten daz huß gelegen zü Rotemburg vnd daz dorff zü Bühel mit dem geriht, zwingen vnd Kennen vnd mit allen andern zü gehörungen, alz lehensz vnd landz reht ist vnd verlihen jm die ouch mit kraft disz briefz, waz ich jm von miner obgenanten Herschaft von österlich von rehtz wegen lihen sol vnd mag, doch vssgenomen miner Herschaft ir manreht, vnd sol ouch die selben lehen vermanen vnd verdienen, alz manlehens reht ist, än geverd, Vnd dez zü vrkünd gib ich obgenanter her Engelhart Cüntz von Bühel disen brief besigclt mit minem anhangenden jnsigel, der geben ist nach Cristy gebürt drivtzehenhundert jar vnd dar nach in dem fünff vnd nivntzigisten jar.

Von einer Abschrift aus dem 15. Jahrhundert. St.-Archiv zu Stuttgart.