In nomine patris et filii et spiritus sancti amen. Nos de domo S. Floriani et de aneso decani ab apostolica sede iudices delegati Constitutis in presencia nostra preposito de Waldhausen et nobili domina Comitissa de Peylnstain super decimis in Sinibelueld legi fecimus litteras, quibus tercius coniudex noster Abbas de Pomgartenberg absenciam suam racionabiliter excusavit. Unde nos in negocio de iure debuimus procedere. Prepositus itaque in audiencia nostra proposuit et tam per testes quam per instrumenta probavit, quod per alios iudices dudum missus fuerat in possessionem causa rei servande ac postmodum per nos verus fuit possessor declaratus et quod domina comitissa se non defendendo prioribus iudicibus nec nobis excomunicationis vinculo fuerit innodata. Ipsa quoque comitissa in iure confessa est, se fuisse excomunicatam et petendo absolutionem iuratoriam cautionem prestitisse, quod coram nobis iusticie pareret. Nos igitur auditis et intellectis et diligenter examinatis, que dicta sunt et lecta, quod euidenter constitit nobis prepositum verum de iure existere possessorem, dicte comitisse sub debito prestiti iuramenti mandauimus, quatenus dicto preposito possessionem predictarum decimarum dimitteret et illa prehabita deliberacione mandatum nostrum humiliter suscepit sepedicte renuncians possessioni. Auctoritate ergo, qua fungimur, confirmamus preposito sepedictam possessionem illarum decimarum impendentes ei canonicam defensionem et excomunicantes omnem, qui eum in eadem possessione inquietare presumpserit. Huius rei testes sunt Abbas de Sitensteten, Magister Ulricus de Gersten, Marquardus Canonicus de Waldhausen, Magister Gotschalcus de Munspach, Magister Fridericus de Nerden et quam plures alii testes fide digni. Data .... Aprilis Anno ab incarnatione domini Millesimo CC. XXXIII.||
||
Hierüber schrieb die Gräfin von Peilstein dem Albero von Arnstein nachstehenden Brief: E. comitissa de Pilesteine Al. de Arnsteine salutem et omne bonum. Scire te uolo, quod dominus papa .... (unum verbum legi non postet, videtur tamen suppleri debere iudices.) dedit contra me super decimis in Sinwelden duabus vicibus et ego citata ab illis feci, quod .... (duo verba legi non possunt.) et quod persuasum est mihi ab illis, quos consului super hoc verbo tandem excomunicata fui et multo tempore carui diuinis. Timens autem periculum anime mee absolucionem tandem pecii ab excomunicatione, qua fueram ligata, et compulsa sum iurare, quod coram iudicibus parerem iusticie. Iudices ergo sub debito prefati iuramenti auctoritate domini pape mandauerunt mihi, ut preposito de Walthusen dimitterem possessionem predictarum decimarum, quam coram primis iudicibus obtinuit et secundis, quod ego tam de consilio bonorum et prudentum uirorum, qui mecum fuerant, quam de mandato iudicum facere sum compulsa. Scias ergo, quod ego ab ipsa possessione cessi et quod non debes meo verbo nec meo nomine dictum prepositum in possessione dictarum decimarum aliquatenus inquietare.

Source Fulltext: OÖUB 3 (Wien 1862) S. 13-15, Nr. 12