Wir Ruger von Gotes genaden Brobst ze Nevnburch tuen chunt allen den, dj Disen Brief horen oder Lesen, dj nu Lebent vnd hernach chvnftich sint, Daz vnser Diener Dietreich der Schiuer vnd sein hausfrowe frow kathrej mit gesamter hant vnd mit aller ir Erben guetleiehem willen verchauffet habent iren wingarten, der gelegen ist in der Cholngrub vnd sint Dreu viertail, Dem Erbern herren hern Perhtolden Dem Brobst vnd seinem Gotshaus ze walthausen vmb aht vnd fvmfzich phvnt beraiter phenning wienner munzz Vnd wan her Perhtolt vnser Chamerer von vnsern wegen des selben wingarten rehter Perchmaister ist, So ist der vorgeschribn chauf vor im geschehen vnd mit seiner hant vnd hat auch reht vnd redleich an gewer vnd an nutz des selben wingarten gesetzet Den vorgenanten Brobst Perhtolden vnd sein Gotshaus also, daz sev den vu^erbaz aigenleich vnd Ledichleich an allen chriech vnd an alle ansprache haben vnd besitzen schulen ze allem dem dienst zehents vnd Perchrehts vnd ze allem dem Reht, als in dj vorgenanten Dietreich vnd sein Hausfrowe frow kathrej enneher habent gehabt. Vnd durch pezzer vestenvng vnd sicherhait diser sache hat der Erber Ritter her wernhart der Schiuer vnsers Gotshauses amptman zusamt dem vorgenanten Dietreich seinem svn gelubt ze schermen den selben weingarten vu^er alle ansprache vnd vu^er allen chriech Dem vorgenanten Gotshaus ze walthausen nach des Landes reht ze Osterreiche. Daz auch diser chauf vnd dise red also stet beleib vnd vurbaz vnzebrochen, Darvber geben wir dem vorgenanten Gotshaus ze walthausen disen Brief ze einem vrchvnd vnd ze einer ewigen sicherhait mit vnserm Insigel versigelt vnd Dvrch Pezzer sicherhait So habent auch dj vorgenanten Her Perhtolt der Chamerer, her wernhart der Schiuer vnd Dietreich sein svn irev insigel zu den vnsern an disen Brief gehangen. Diser red vnd dieses Chouffes sint gezeug Her Jacob der Techent, Her Ott von wienn vnser Siechmaister vnd Her Eberhart der Guster die erbern Briester, Darnach Her Gervnch von Otachring, her Herman ymian dj zwen Ritter, Darnach Gervnch hern Choln svn, Herman von Freising, Chvnrat Ru^edwein, Gerwot, fridreich Hetzman, Ott der Humbl, fridreich der En, Ortl Marheker, Pilgreim der fleishacher, Leubel der Smit, fridreich der amman vnd ander frvmen Leut genuech, den dise red wol chvnt ist. Diser Brief ist gegeben ze Nevnburch, Da nach Christes gepurte waren ergangen Tausent iar, Drevhvndert iar, Darnach in dem Sehsten iar an vnser frowen abent ze der Liehtmesse.

Source Fulltext: OÖUB 4 (Wien 1867) S. 497-498, Nr. 534