Johannes episcopus seruus seruorum dei Dilectis filijs Abbati Glunicensi et sancti floriani Patauiensis diocesis ac sancti Nicolai extra muros Patauienses Monasteriorum per Prepositos solitorum gubernari Prepositis Salutem et apostolicam benedictionem. Inter ceteras solicitudinis nostre curas, que nobis ex debito officij ||
Pastoralis incurabunt, illud precipuum esse dinoscitur, ut cultus diuinus fideique orthodoxe deuotio ubique nostre cooperationis ministerio augeatur. Sane dilectorum filiorum Prepositi et Conuentus Monasterij in Walthausen per Prepositum soliti gubernari ordinis sancti Augustini Patauiensis diocesis petitio continebat, quod dudum Venerabilis frater noster Episcopus Patauiensis attente considerans necessitates et inopias ipsius Monasterij, quod in multis helemosinis ac alliis hospitalitatibus et fluentibus largitionibus habundare solebat, quodque ipsum propter malum statum partium ipsarum quasi ad nichilum redactum erat ita, quod edificia ipsius pro maiori parte minabantur ruinam nec in ipso Canonici ipsius comode poterant residere nec superuenientes inibi, prout moris fuerat, recipi, pro huiusmodi necessitatibus et helemosinis ac hospitalitatibus supportandis et rehedificatione dictorum edificiorum Parrochialem ecclesiam in Muspach (sic) cum capella sancti Thome eidem Ecclesie subiecta dicte diocesis, in qua prefati Prepositus et Conuentus ius obtinent patronatus, quarum fructus, redditus et prouentus Triginta Marcharum argenti secundum taxationem decime ualorem annuum, ut asseritur, non excedunt, cum omnibus iuribus et pertinentiis earundem de consensu dilectorum filiorum Capituli Ecclesie Patauiensis eidem Monasterio auctoritate ordinaria in corporauit, annexuit perpetuo et uniuit ita, quod cedente uel decedente ipsius Parrochialis Ecclesie Rectore uel dicta ecclesia cum Capella prefata quocunque modo uacante liceret eisdem Preposito et Conuentui dicte Parrochialis Ecclesie cum Capella predicta corporalem possessionem apprehendere ac in usus eorum proprios perpetuo retinere reseruata de fructibus ipsius Parrochialis Ecclesie congrua portione pro perpetuo vicario inibi canonice instituendo curam animarum Parrochianorum dicte Ecclesie gerente, ex qua comode sustentari ualeret, iura episcopalia soluere et alia incumbentia ei onera supportare. Quare pro parte dictorum Episcopi per eius litteras ac Prepositi et Conuentus fuit nobis humiliter supplicatum, ut premissa ex certa scientia confirmare de benignitate apostolica dignaremur. Quia uero de premissis noticiam non habemus, discretioni uestre per apostolica scripta conmittimus et mandamus, quatenus uos uel duo aut vnus uestrum per uos uel alium seu alios, si est ita, unionem, incorporationem et annexionem huiusmodi per dictum Episcopum de dicta ecclesia cum prefata Capella, ut premittitur, factas auctoritate apostolica confirmare curetis. Datum Auinione vij Kalendas Martij Pontificatus nostri Anno Quartodecimo. A. de villa.

Source Fulltext: OÖUB 5 (Wien 1868) S. 574-576, Nr. 573