Ich Fridreich der Hausler vergich vnd tu°n chunt an disem prief, Daz mich meine Herren die fu^ersten Herczog Albrech vn°d Herczog Ott geben habent dem gotshaus ze walthausen zv einem verhorer vmb irre zehent, die da ligunt sint in sant Jorger pharrê, di in der von Bupelsperch von meiner Herren wegen der Herczogen in Osterreich cze chrieg hat getan, nu pin ich des geweizt mit gu°tem vnd offen vrchunt, die si vber die selben zehent habent vnd auch mit erbern Herren mit hern Tursen von vreinstain, mit Hern Eberharten dem Chappeller, mit Hern Jansen von Bupelsperch, mit Hern ludweigen dem Techent ze chrems, mit maister Petern pharrer ze aprechczperg, mit dem Techent von Nernden, die allê die selben vrchunt mit sant mir gesehen habent, daz die vorgenanten zehent des gotshaus sint ze walthausen mit allem recht, vnd dar vber zv^e einem geczeug vnd zv^e einem offen vrchunt diser sache gib ich in disen Prief versigelten mit meinem insigel. Diser Prief ist geben, do von Christes gepurd sint ergannen Drevczehen Hundert jar, dar nach in dem Aecht vnd dreizzigisten jar an sant Cholmans Tag.

Source Fulltext: OÖUB 6 (Wien 1972) S. 279f., Nr. 276