Ich Peter der Sturme, Purger ze Newnburch vnd ich Elspet sein housfrowe wier veriehen mit disem brief vnd tu^en chund allen den, di in lesent oder ho^erent lesen, di nu lebent oder hernach chûnftich sind, daz wier mit vnserr Erben gu^etem willen vnd gunst vnd verdachtem mu^et vnd mit gesampter hand zden zeiten, do wier ez mit recht wol getu^en machten, vnd auch mit vnsers gruntherren hand dez Erbern herren hern Ru^edweins Brobst ze Neunburch chlosterhalben recht vnd redlich gemacht vnd geben haben vnserm sun hern Hansen Chorherren ze Waldhausen zu einer pezzerung seiner phru^end dreu phunt wienner phenning geldez auf vnserm hous mitsampt der hofstat hinden daran, daz do leit an dem Newsidel in der plindengazzen zenachst Seifridez hous der Ru^egerinn sun, da man alle iar von demselben vnserm hous vnd von der hofstat hinden daran dienet fûmftzehen wienner phenning ze gruntrecht vnd sechs phenning ze vogtrecht vnd nicht mer, also mit auzgenomen warten, daz wir oder swer daz egenant vnser hous vnd die hofstat hinden daran nach vns besitzt, im die vorgenanten dreu phunt wienner phenning geldez fu^erbaz alle iar davon dienen sol ze drin zeiten in dem iar, ain phunt wienner phenning ze weynachten, ain phunt wienner phenning ze Vaschang, ain phunt wienner phenning an sand Go^ergen tag, vnd mit alle dem nutz vnd recht, als man ander purkchrecht in dem land ze Osterrich dient, Vnd sol auch mein herr der Brobst von Waldhausen noch der Conuent daselbs zu seinen tagen daran nichtes ierren vnd mit dem gelt nichtes nicht ze schaffen haben, Vnd nach vnsers suns hern Hansen tod so sullen die obgenanten dreu phunt wienner phenning geldez geuallen in der herren oblai ze waldhausen vnd sullen die mier Petrein dem Sturm vnd meiner housfrawen Elspeten vnd vnserm sun hern Jansen dem Chorherren vnd vnsern vodern allen allierlich darvmb begen einen ewigen iartag Mit vigili, Mit selmesse vnd mit andern gu^eten dingen nach irs ordens gewonhait. Wer aber, daz vnserm egenanten sun hern Hansen von Waldhausen dehainer gewalt oder irrung an den oftgenanten drin phunten wienner geldez vor seinem to^ed von dem Conuent ze Waldhausen, als vor genant ist, icht geschêch, so haben wier dez frey wal die oftgenanten phunt geldez oder vnser Erben ze geben auf ein ander gotzhaus, wo vns daz allerpest fu^egund ist oder swa wier hin wellen, vnd mag vns auch niemant daran geirren. Wier haben auch vrey wal di vorgenanten dreu phunt wienner phenning geldez abzechauffen ab dem obgenanten vnserm haus vnd der hofstat hinden daran auf ein ander erb, daz dreu phunt geltes wol getragen mag, so ist vnser êgenants haus vnd di hofstat hinden daran dann wider ledich vnd frey an alle widerred vnd an allen chrieg. Vnd sein auch wier ich egenanter Peter der Sturme vnd ich Elspet sein hausfrowe der oftgenanten dreu phunt geldez vnsers suns hern Hansen Chorherren vnd detz Conuentz ze Waldhausen nach vnsers suns to^ed vnd sein selbs zu seinen tagen recht gewer vnd scherme fu^er vns vnd fu^er alle vnser Erben nach dez landez recht in Oesterrich. Vnd daz diseu sach also fu^erbaz stêt vnd vnzebrochen beleib vnd wand wier selben aigens jnsigels nicht enhaben, dez geben wier in disen Brief zu ainem warn sichtigen vrchund versigelt mit vnsers gruntherren jnsigel dez Erbern herren hern Rudweins dez Brobsts ze Newnburch vnd mit hern Dietreichs jnsigel von Gundramstorf vnd mit dez Erbern mannez Petreins dez freysinger jnsigel, di wier dez gepeten haben, daz si der sach getzeug sein mit irm jnsigel. Der brief ist geben nach christi gepu^erd Anno Millesimo CCCmo, XLmo quarto, proxima dominica post Johannis Baptiste.

Source Fulltext: OÖUB 6 (Wien 1972) S. 484ff., Nr. 481