Wier Wisenth von Gotz gnaden Brobst ze Walthausen veriehen offenbar an dem brief vnd tu^en chunt allen den, die in sehent, ho^erent oder lesent, daz wir mit voller gunst vnsers conuents auz der oblay genomen haben sibentzig phunt wienner phenning, Damit sechs iarteg ewichlich pei vnserm gotzhous ze begen sind gestift, Von erst vnserr fu^ersten von land Chunig Fridrich seligs von Rom vnd aller seiner vorvodern jartag, Darnach die jarteg des erbern mannes hern Pauln pharrer von Alten Ysper, Der Wupelspergerinn, Des Lantzenperger, Reinbots von Ysper, Vnd des alten richter von Ybs. Wir haben auch diselben sibentzik phunt phenning nach vnsers conuents rat vnd gunst angelegt an pawe vnd an gold, di wir darvmb gechauffet haben, Vnd haben fur daz selb selgeret vnd guld den herren in di oblai lazzen den zins von den drin chirchen Sechsen, Grein vnd Chreutzen, der vnser brobstei an geho^eret, Den si nutzen vnd niezzen sullen als lang, vntz wir êgenanter brobst Wisenth oder vnser nachchomen, wer brobst sei, diselben sibentzig phunt phenning den herren in di oblay gantz vnd gar wider cher vnd seu der vollichlich bericht. Vnd wanne auch daz geschicht, so ist derselb tzins wider ledig vnd dienet in di brobstei. Darzu^e veriehen auch wier, Daz wir von dem edeln fursteu Hertzog Otten von Osterreich seligen haben ingenomen ein geld, darumb wir zwai phunt geldes ewigs gechouffet haben von dem Chadawer vnd diselben zwai phunt geld ligent auf drin guetern ze Schaterle vnd auf einem weingarten, dar vmb wir auch seinen jartag sullen begen ewichlichen. Wir veriehen auch, daz wir vmb einen jartag vron Chunigunten von Chappell ingenomen ain phunt geldes, daz auf drin guetern gelegen ist ze Naglarn. Wir veriehen auch me, daz wir vmb einen jartag hern Jansen seligs von Wupelsperch haben ingenomen achtzehen schilling geldes, daz wir haben auf einem Weingarten gehaizzen der Man, darvmb man im mit seinem iartag alle wochen am Eritag ein messe von dem heiligen gaist sol begen, Vnd sullen auch di êgenanten herren dez conuents diselben vor verschriben guld, di vns vmb diselben iarteg warn sind, so lang inne haben vnd niezzen, vntz wir êgenanter brobst Wisent oder vnse.r nachchomen, wer brobst ist, in diselben guld mit gleichen geld widerleg, so ist auch furbaz derselb geld der brobstei ledig an allez gever. Wir haben auch di vor verschriben wandlung nach rat hern Heinreich di weil techent vnd der gemainscbaft dez conuents zder zeit, do wir ez wol getu^en machten, geo^ernet vnd geschikcht Vnd zu einer warn bestetigung habent si ir insigel zusamt dem vnserm gelegt an den brief, der geben ist Anno domini M°. CCC.xlviij°. In festo beatorum Symonis et Jude apostolorum.

Source Fulltext: OÖUB 7 (Wien 1876) S. 76f., Nr. 76