Ich Heinrich der Ru^entinger vnd mit sampt mir alle mein erben vergich vnd tu^en chund an dem brief allen den, di in sehent, ho^erent oder lesent, daz ich mein liben vrowen vnd mueter vron Revtzen di Ru^entingerinne an dem hof, der gelegen ist in dem do^erff ze Weizzenchirchen pei Chappelle, der ir morgengab ist, den auch si in nutz vnd in gewer halben hat, nindert ierren sol mit dehainer sachen zu versetzen noch zu verchauffen pei irn tagen, noch mit dehainer anderr irrung sol ich noch mein erben sei hindern, mit weu daz genant sei, si schaff mit demselben halben hof Iedichlich vnd lautterlich allen irn frum, wi si welle, di weil si lebt. Geschech aber dez nicht also, daz ich oder mein erben daz gelub inder vberfu^ern, als vorgeschriben ist, so sol ich allen meinen geswittreden meins rechtes veruallen sein, dez ich an demselben hof haben sold, vnd sol auch ich vnd alle mein erben fu^erbaz allez rechten an dem hof gentzlich vertzigen sein also, daz wir dehain ansprach darzu^e nimmer mer sullen haben. Vnd daz di mainung von mir vnd von meinen erben allen also stet vnd vnuerchert beleib, als vor verschriben ist, do gib ich vorgenanter Heinreich meiner vrowen vnd mu^eter vron Reytzen den gegenburtigen brief versigelten mit meinem anhangunden insigel. Der sach ist getzeug Hartmu^et der Fleischezz vom Stain vnd Leutolt der Staynreuter, di zu einer warn betzeugung durch meiner pet willen ier insigel auch an den prief gehangen habent, di auch pei denselben tainding gewesen sind, vnd ander erber leut gnu^eg. Der prief ist geben nach Christi gepu^erd vber dreutzehen hundert jar, darnach in dem neun vnd viertzkisten iar an aller manne Vaschang tag.

Source Fulltext: OÖUB 7 (Wien 1876) S. 95f., Nr. 97