ICH Mathes, zden zeiten pharrer ze Chreutzen, vergich vnd tun chunt allen den, di disen brif sehent oder ho^erent lesen, daz ich mit wolverdachtem mu^et zder zeit, do ich ez wol getu^en macht, gegeben vnd geschaft han meinen herren hern Heinrich dem Stainreuter, zden zeiten brobst ze Waldhausen vnd dem conuent daselbs in di oblai einen weingarten ze Ru^estorf, der gelegen ist zenachst pei dem weingarten, der da haizzet daz selgerêt, den ich gechauffet han vmb XL phunt phenning, auf di red, daz mir di vorgenanten herren ze Waldhausen sullen begen alle iar meinen iartag ewichleichen, als der brief sait, da auch ander mein geschêft an stet, vnd daz di red also stêt beleib, dez gib ich in den brief versigelt mit meinem petschat, wand ich anders jnsigels nicht enhan, vnd mit meins herren hern Otten von Volchenstorf jnsigel, daz er durch meiner gepet willen daran geleit hat. Datum Anno domini M°. CCC/m°XLVIIII.° proxima dominica post Michahelis.

Source Fulltext: OÖUB 7 (Wien 1876) S. 144, Nr. 145