Wir Johannes von Gotes gnadn brobst ze Walthusen ich Ott der techent vnd der conuenf doselbes veriehen an dem prief vnd tu^en chunt alle den, di den prief sehent oder ho^erent lesen, daz vnser herren ainer her Vlreich vnsers ordens des conuents hat bedaht seiner sel hail mit gepet vnser aller guetleichn willen vnd mit veraintem rat, daz er ain lieht in Gotes dienst Marie vnd sand Anne vnd sand Johans vnd aller heiligen von seiner rechten phru^empt ain lieht hat bestaetigt ze prinnen von o^el in einer lampen zegesicht alle naht ewichleich in dem winchel gegen der stieg, do man auf vnd ab get zdem refent zden paiden seiten vnsers conuents, vnd hat daz selb lieht bestaetigt mit fu^emf shilling phenning wienner munzze, die er hat gechauft vmb sein phenning seiner phrumpt auf dem guet genant datz dem Langen, daz rehtes vreyes aygen ist gelegen in Mvnspekcher pharr vnd vns bestaetigt ist mit dem prief, den wir ze vrchund daru^eber haben, vnd dieselbn fu^emf shilling phenning sint bestaetigt mit v^erchund vnsers priefs zegeben alle jar an sand Cholmans tag dem, der zder zeit guster ist vnsers gotzhaus also, daz der selb guster vnuertzogenlich sol an alle widerred dazselb licht haizzen zv^enden zeprienen in ainer lampen alle naht, als vnsers gotzhavs gewonhait ist zeprinnen als ander lampen di wir haben in vnserm gotzhavs. Daz das selgeret mit gepet vnd mit gesheft von vns vnd von allen vnsern nahkomen also staet vnd vnuerchert beleib, dar vber geben wir Johannes vnd mit vns der ersam conuent den offen prief vnd vrchund bestaetigt mit vnsern paiden anhangunden jnsigeln. Gebn ze Walthusen nach Christi gepu^ert drevczehen hundert jar, dar nah in dem vier vnd fu^emftzigkistem jar an sand Jacobs tag.

Source Fulltext: OÖUB 7 (Wien 1876) S. 372, Nr. 361